股海實戰:國際煤機短線諗得過

周一大笨象(00005)股價走高,但收市後公布嘅季績未能取悅機構投資者,當日倫敦股價受壓,假前上車者要自求多福!至於港股走勢,雖然周一市況反彈,但成交不足,「五窮」格局未有太大變化。

阿莊情意結甚深嘅中芯國際(00981)終於有出頭日,周一午後有飛機盤到,掃上全日高位0.86元收市,升幅16%,成交超過7億元,呢口悶氣出得真係痛快!好在本月初增持60萬股,但略嫌唔夠喉,見周一股價衝穿0.8元唔肯回,遂以平均價0.81元,再追入60萬股,相信十九日季報公布前股價可繼續反覆向好,若然有利好消息配合的話,目標可以挑戰1元大關。

中國海澱值得留意

查實除咗中芯之外,見到唔少二、三線股有異動,如鉑陽太陽能(00566)、中國木業(00269)、中聚雷天(00729)、維奧集團(01164)及志高(00449)等,成交額都以億元計,周一見報推介嘅中國海澱(00256)升2.94%,收報1.05元,可以望多兩眼!

此外,內地水務股亦係值得關注嘅板塊,皆因聽表叔線話,短期醞釀利好政策出台。講到水務股,阿莊首選仍然係北控水務(00371),主要係近年交得出成績表,加上有注資概念,呢啲位進場揸得安心。

周一煤炭股亦有鑊氣,兗州煤業(01171)升3.62%,收報28.6元;中國神華(01088)升1.16%,報34.95元。同屬煤炭股嘅福山能源(00639)獲首長國際(00697)增持,作價相等於每股5.27元。福山周一收報5.57元,升4.7%。

首長國際增持有助推動二者的關係更加密切,而且福山股價表現亦落後於同類股,今次增持多咗價錢可以參考,下周一公司將會派發末期息每股0.1元除淨,不妨可以博吓財息兼收,目標上試6.2元阻力位,跌穿5.3元止蝕。

煤礦機械需求不斷

從事煤炭周邊產業嘅國際煤機(01683),周一股價表現亦十分亮麗,高位做8.82元,收報8.75元,升幅13.2%,成交2.02億元。

公司主要從事製銷掘進機、採煤機,刮板輸送機及相關產品。雖然話政策鼓勵煤炭行業「建大關小」,令上千個小煤礦關閉,但同一時間,行業鼓勵大型煤礦全面提高機械化率,以改善安全性及效益,故煤礦機械的需求依然持續不斷。

高盛唱好睇9.1元

上月,高盛發表報告唱好國際煤機,建議買入,目標價睇9.1元,現價離該目標價不遠。國際煤機現價一一年預測市盈率約十八倍,估值仍較同業三一國際(00631)(一一年預測市盈率二十四倍)便宜,保守啲用預測市盈率二十一倍計,目標價可定喺9.7元,短線回吐守8.4至8.5元仲有得諗,向下則宜守7.8元。

戰報

昌興國際(00803)

冼金基上月二十八日睇中隻昌興國際,本周一曾高見0.51元,較推介當日低位0.46元,累升10.8%。

哈爾濱動力(01133)

志強上周四推介嘅哈爾濱動力,本周一高位做8.64元,若喺推介日低位7.86元上車,五日內已賺近一成。

跨媒體地產網新居入伙 幾萬個精選樓盤 歡迎睇樓!

「Money18免費即秒股票報價網站」現推出8升級功能,財經資訊,實時實發!

阿莊