滙豐戴志凱 升去中國
當大家都等緊下星期滙控(00005)公布今年首季業務概況,尋日旗下嘅滙豐銀行(中國)就公布新人事變動,委任戴志凱為滙豐中國副行政總裁兼執行董事,有關嘅任命已經獲監管機構批准。
滙豐對上一次重要人事變動,要數番鄭海泉喺二月尾辭去滙控執行董事職務,當時冇講明佢係咪同時辭去滙豐中國董事長個位,不過個個都當佢一次過辭晒呢啲有實務嘅位。
曾在歐美任要職
戴志凱原來加入滙豐超過二十五年,喺滙豐歐洲同北美地區擔任過要職,對上一個職銜就喺滙豐美國北美地區工商業務主管,常駐紐約。
今次跨過半個地球加入滙豐中國,並唔喺毫無因由,事關戴志凱早喺倫敦工作期間,已參與過滙豐嘅中國事務。