短炒倉：哈動反彈勁度十足

港股走勢進一步轉差，恒指尋日急跌300多點，但自日本大地震以來幾乎未好過嘅幾隻核電相關股，反而趁跌市作出「報復式」反彈，上氣（02727）、東氣（01072）、中核（02302）升幅介乎4至8%，而哈動（01133）升近一成，收報7.93元。

哈動股價在日本大地震發生前報10元左右，尋日最低曾見7.1元，較高位唔見咗接近三成，原因大家都知，就係福島核電廠事故，令中央叫停核電項目審批，哈動等一眾電力設備股，前景因而蒙上陰影。

核電項目比重不高

以去年營業額計，火電設備仍是主要收入來源，佔總收入的62%，至於年內新簽定單總值424億元人民幣，當中煤電設備仍佔41.7%、水電設備佔3.3%，電力工程佔20.8%，至於核電設備則佔25.8%。而哈動管理層為降低市場的憂慮，早前亦現身解畫，表示目前手頭累計1,000億元人民幣定單中，核電設備只佔180億元。既然核電佔哈動不到兩成生意額，但股價就已經唔見咗三成，何況內地核電發展步伐放慢只屬暫時，股價明顯跌過龍，昨日單日轉向，以一支大陽燭升穿10日線，相信短線可重上9元水平，止蝕7.4元。

哈爾濱動力（01133）

目標價：9.0元　止蝕價：7.4元