Fundman睇市：廣州藥業收集時間到

內地A股跌不停，滬綜指去到超過兩個月收市低位，唇亡齒寒，港股亦連跌六日，尋日再插318點，收市報23,315點，五月期指大低水，收報23,060點，即使唔計藍籌除息的影響，仲比實際理論值23,140點低水80點，基金經理要錢唔要貨，唔少二三線已去到今年低位，唔通「Sell in May，Go away」的魔咒發揮作用？

第二季剛剛過咗三分之一，但客觀環境似乎唔係太樂觀，第二季中國經濟幾乎可以肯定係通脹繼續谷、GDP及PMI繼續縮的格局。美國QE2之後無QE3，債王格羅斯狂沽美債睇息升。歐元區仲麻煩，尋日剛公布三月份零售銷售遠差過預期，跌1%，可見加息前零售市道已經唔掂，西班牙失業率去到兩成樓上，創咗十四年新高。

港股暫難擺脫悶局

睇住報紙，近排要搵好消息支持真金白銀入市搏殺，恐怕唔易，但咁樣係咪代表可以做淡？睇番港股自去年九月開始早就無方向，响22,123至24,988點內唔夠3,000點，玩咗就快八個月，以尋日收市指數23,315點，只係比年初升280點或者1.2%，既無大升，何來大跌？

到底上落市仲要玩幾耐？睇怕最快都等內地通脹見頂，人行唔再抽（銀）根至有運行，唔少大行年初估四五月，近期紛紛改口風睇六七月，不妨信埋今次，可是五月份股市悶局，似是在所難免。

○八年金融海嘯之後，內地藥業股恍如會生金蛋的雞一樣，成為基金熱捧對象，但自從國家去年對藥品實施更嚴厲的價格監管，藥業股強勢也告一段落。今年三月初發改委宣布162種藥品平均降價21%，更是踩多一腳。然而，留意到普遍藥業股估值，大幅從一○年高位回落，重返歷史平均水平，考慮到國家限價不可能永無止境，尤其下半年當通脹穩定後，今年作為「十二五」開局年，內地新醫改下對藥物長遠需求看好，部分優質企業可以考慮開始進行低位收集。

從事中成藥生產、批發及銷售的廣州藥業（00874），由年初高位14.34元，去到上星期最低8.63元，最多跌近四成。昨日見火燒冷灶，逆市升0.36元，見9.33元，甚具瞄頭。

整體毛利大幅改善

去年的強勢，一來旗下王老吉品牌表現唔錯，而且連續兩年業績強勁復甦。○八至一○年盈利分別為1.71億、2.15億及2.79億元（人民幣．下同），○九及一○年按年增長分別是25.7%及29.7%，製藥毛利持續改善，儘管貿易業務毛利率有點停滯不前，但已足夠使整體毛利率大幅由○六、○七年的17%及15.1%，升至過去三年的29.1、26.6及27.5%。

今年首季，廣藥按中國會計準則計算，歸公司股東淨利潤為8,698萬元，按年升27.4%，增長較大行預測的全年增長數字21.1%為高。綜合市場預測全年盈利3.39億，預期市盈率17.3倍，已較年初高位30.7倍大幅回落。

回顧金融海嘯後，廣藥兩次低位，分別是14.5倍和15倍市盈率，股價早前見8.63港元，相當於一一年16.1倍市盈率。可以相信，即使未見底也是離底不遠，已係時候可以低位收集。