太子手記：平保講前景 安撫坐艇股東

內地銀行、保險公司好興搞啲投資者網上交流活動，尋日中國平保（02318）就搞咗個，太子自然唔會錯過，睇吓啲內地股民有咩意見，其中一個自名係「套牢平安」嘅股民問咗一條好有切膚之痛嘅問題：「您唔回答我嘅問題，係認為我140元買嘅平安A，喺這輩子都解不了套嗎？活着真沒意思了！」

平保第二把手副董事長兼副首席執行官孫建一咁鬼好反應，先係好有禮貌咁話，多謝長期支持（至少呢位股東無將平保斬倉），不過呢，「二級市場的股價受多種因素影響，不便評論。」咁即係閣下自重啦，我哋幫你唔到。唔知幾時到香港有呢啲網上交流呢？好想睇吓香港股民嗰啲問題。

孫建一拍心口經營達標

講開又講，平保首季純利按年上升近三成，孫建一就向小股東剖析，話首季綜合成本率水平良好。佢仲拍心口話，平保首季整體表現令人滿意，有信心完成今年全年經營目標，並預計今年業績及淨利潤將保持平穩發展，總規模保費有15%以上的增幅。