股海實戰： 南車雙雄潛力未反映

上周標普突然將美國信貸評級展望下調至「負面」，對於唔少依「評級」行事嘅基金造成影響，特別係一旦美債評級有變，基金組合或須作較大幅嘅調整。見假前部分資金率先重投商品及股市，港股重上24,100點樓上。

尋日A股低收，滬綜指失守3,000點關，「五一」前低位可能係入市機會。展望本周，聯儲局議息、特區政府賣地、期指結算及企業業績消息，以及「五一」長假因素等影響下，港股表現或較反覆，估計恒指波幅介乎23,800至24,500點。

假前大摩調高大笨象（00005）評級至「增持」，目標價上調至100元。事緣集團將於五月十一日為投資者舉行「策略日」，話唔定會宣布一系列業務重組計劃。上周四該股收報84.05元，升1.39%。睇走勢下兩個阻力位分別位於85.5元及88.5元，250日線80.4元不容有失。

長假期間各大地產商積極推售樓盤，恒地（00012）表示，今年以來售樓套現金額已達到85億元，故將今年售樓目標由100億元上調至150億元，此舉料可引發券商重估。此外，長和系旗下嘅匯賢（87001）將於本周五掛牌，正所謂「人逢喜事」，估計長實（00001）股價波幅料介乎123至132元，可留意相關認購證。

早前中國鐵道部發生高層人士變動，引發投資者關注內地鐵路產業政策可能受到影響，中國南車（01766）及其持股56.17%嘅南車時代（03898）捱沽，南車股價由高位11.36元落到7.64元，而南車時代就由34.5元回落至25元，二月底至本月中，二者股價均喺低位徘徊，磨滅股東意志，相信唔少長期捧場客都被震走。好在阿莊手貨買得平，近周兩隻股股價終於有起色，總算守得雲開！

產業政策不虞有變

阿莊一直冇沽貨，信念只得一個：無道理國策會受部門個人去留影響。雖則話人士有變，或會影響落實政策嘅進度，但總體產業發展策略不應因此而有重大變化。

事實上，從南車時代剛宣布嘅首季度業績可見，今年公司進入豐收期嘅說法兌現，季內營業額同比大增93%至19.94億元（人民幣．下同），純利4.72億元，增幅2.1倍，相等於去年全年純利嘅55%，毛利率增至40.8%。難怪假前股價異動，高位見33.25元（港元．下同），收報32.65元，升4.98%，如無意外，股價可挑戰今年高位，合理值可見38元，調整宜守29.5元。

中國南車首季純利9.46億元人民幣，同比增長1.6倍。雖然論毛利率，中國南車不到20%，相對而言，南車時代確有其過人之處。不過，阿莊認為，中國南車除咗可以分享南車時代嘅高增長之外，其本身喺新能源汽車領域嘅發展，潛力不容忽視。本月中旬，南車製造嘅第1,000架電動汽車經已下線，惟呢方面嘅發展尚未充分反映喺股價上。所以阿莊嘅結論係，呢兩母子都揸得過！

戰報

金川國際

（02362）

錢進上周二話可以冷敲嘅金川國際，上周四股價高見4.83元，較推介日低位3.01元，勁升逾六成。

鐵貨

（01029）

鐵貨持續有追捧，上周四搶高至2.4元，跟Sammi於十五日低位1.94元上車，短線又賺近24%。