Fb教主見總統 着老西
美國總統奧巴馬為期三日嘅Sell削赤方案之旅圓滿結束，喺標普日前恐嚇調低評級嘅陰霾下，總統先生自然Sell得落力啲，削赤之旅嘅其中一站，係佢紆尊降貴去咗社交網站Facebook位於加州嘅總壇，「親親」年輕人。
為咗奧巴馬今次出巡，平時淨着T恤短褲嘅Facebook教主朱克伯格特登着番套老西，仲打埋呔，奧巴馬話自己就係可以令朱克伯格執到正嘅人。喺座談會尾聲，朱克伯格向奧巴馬送上印有公司logo的連帽衞衣，似乎係提醒日理萬機嘅總統先生，百忙中都要抽啲時間上吓Facebook。
奧巴馬順便拉票
奧巴馬準備競逐連任，時移世易，網民力量實在不可小覷，所以今次座談會搞埋網上直播。
奧巴馬Sell削赤之餘亦不忘拉拉票，話會好似○八年選總統咁，再用Facebook做競選工具，難怪有人話今次搞座談會有宣傳Facebook之嫌。