太子手記：巴菲特用人不善股東索賠
喺好多投資者眼中，股神巴菲特係「神」，無論投資哲學或企業管治，標準定得好高，自從接班人之一嘅David Sokol偷步買股，最後要呈辭了結同股神關係之後，外界開始質疑佢嘅管治能力，最近更有小股東入稟法院，控告巴菲特及投資旗艦巴郡，今回真係老貓燒鬚。
偷步買股累巴郡
當地一份法院文件顯示，一名巴郡投資者Mason Kirby入稟要求巴郡賠償，指被告之一嘅Sokol，喺建議巴郡收購美國機器潤滑油生產商Lubrizol前偷步買股，喺今年一月購入9.6萬股，巴郡三月同意90億美元收購該公司，呢個行為被視為損害公司利益。
Kirby表示，Sokol知悉巴菲特會考慮及接納其建議，因此Sokol嘅行為不道德，令巴郡嘅名譽嚴重受損及帶來其他損失。
小股東指股神同Sokol行動一致，違反對股東嘅責任，令公司或被證監會採取行動及被信貸評級公司降級。
巴菲特被指違反對股東嘅責任。