期指攻略：淡倉博賺盡 目標23370

美國主權評級展望被調低，美債將來有機會無咗三個A！以目前美元在全球儲備貨幣的重要性，打句問句都唔信。不過，試問今日有多少利好訊息支持港股？看來一次較具規模的調整，已是無可避免。

昨日港股雖然是單邊跌市，但過程可是悶死唔少即市炒家，早市期指開23,640點後，23,654點的高位可謂一瞬即逝，十點半前，期指已下試23,423低位，亦都開始100點波幅悶到收市。午後滬綜指反彈後再回試3,000點關口，期指一度跌穿早市低位見23,417點，可能由於即市已走了237點波幅，淡友並無乘勢踩多一腳，一直在23,440至23,480點之間橫行直到收市。由現貨成交不到700億元及低水幅度看，唔少大戶沽盤因為無法在現貨市場找到充足承接，索性在期貨市場增加套戥。

昨日期指已低於筆者平倉目標23,500至23,550點，這要多得評級公司出手，加速了今次調整。昨日無論恒指及期指都受制於20日線23,678及23,675點，筆者會以23,527點作為止賺，今日希望在23,370點樓下平倉，借氣氛急速轉差的機會，實行贏到盡。