股海實戰：中芯安心持貨候佳音

標普調低美國政府信貸評級展望至負面，拖累美股前晚急跌，加上歐洲債務危機又再受關注，外圍市況告急，為淡友找來反攻藉口，恒指尋日繼續走低，收報23,520點，跌309點或1.3%，主板成交僅693億元。

標普話美國政府負債過高，美國政府可能無法喺一三年前解決財政問題。對此，美國政府官員嘅回應係，對方低估咗美國嘅能力。老實講，美國政府只管印公仔紙吊命嘅做法唔長久，人盡皆知，標普嘅行動只係說明事實。同樣，惠譽早前表示，未來三年內地銀行業資產質素可能會惡化，並將中國長期本幣發行人違約評級前景從穩定下調至負面。對此，人行行長周小川直言對方「不專業」，更以評級公司無法預測歐洲主權債務危機為例，直截了當否定咗對方嘅判斷。

唐宮新登場炒味濃

個股方面，新股唐宮（01181）首日掛牌，表現未受跌市影響，高位見2.45元，收報2.31元，較招股價1.65元升40%。公司市值才9.24億元，但尋日成交達4.13億元，可見炒味甚濃。畢竟只係內地餐飲股一隻，前景幾好都有個譜，高追要小心。

早幾日短炒過嘅鐵江現貨（01029），尋日落過1.92元，有位上得番車，只係見到市況轉淡冇胃口，所以冇做嘢，估唔到隻股炒到上全日高位2.16元收市，單日升幅達9%，成交2.1億元！

引入中投意義重大

阿莊揸咗好耐嘅中芯國際（00981），前晚宣布向中投發行可換股優先股及認股權證，總代價2.5億美元，行使價同為5.39元，按1換10比例計，實際換股價相等於每股普通股0.539元，集資所得擬用作資本開支及減債。假設中投、大唐電信及台積電各自悉數行使手持嘅可換股優先股、認股權或優先認購權，則三者嘅持股量將分別為13.07%、19.08%及6.53%。

查實投行早已預計中芯要諗計抽水，中投背景唔使多講，能夠找到中投伸出援手，顯見上大人對中芯嘅情意結猶在。至於大唐和台積電，目前中芯呢項投資對佢哋嚟講係小數目，但若然改造成功，日後呢項策略性投資嘅回報又唔可以太過低估。如今最重要係給予中芯時間，證明近年新管理層實行嘅新策略可行，只要成功構建持續性嘅盈利基礎，公司價值將會得到釋放。

阿莊一再講過，手持嘅中芯股份係用先前炒作該股嘅利潤買入，用免本嘅心態持貨。呢隻股先天優勢未改，舊年嘅人事變動成了轉捩點，今次以可換股優先股引中投入股嘅做法，再次顯示上大人支持未減，亦唔想喺呢個時候益外人。

大家可能會覺得，阿莊對於中芯太過「癡情」，阿莊亦不得不承認，中芯呢鋪翻身戰為時比預期長，但就係因為一份執着，加上持貨亦唔多，呢啲位下跌空間亦唔會太大，會繼續揸緊魚竿靜候佳音！

戰報

鐵江現貨（01029）

阿莊上周二睇好鐵江現貨，當時低位只係1.81元，跟佢上車走番轉，尋日高位2.16元食胡，可賺逾19%。

琥珀能源（00090）

Sammi上周四吼中嘅琥珀能源，尋日逆市向上，高見1.61元，較推介日低位1.4元，累升15%。