股海實戰：上實城開山雞變鳳凰

內地三月份通脹數據超出預期，控制通脹已成為國家首要處理嘅大事。由於三月份發生「瘦肉精」事件，肉價上升，料食品價格仍會上漲，加上服務及工資通脹情況較預期厲害，次季通脹將繼續尋頂，中央嘅緊縮政策力度將有增無減。話口未完，人民銀行尋日就宣布，上調存款準備金率0.5%，是今年來的第四次。

不過，正當投資者擔心內地通脹會否失控，IMF則預期，未來數月內地緊縮政策持續發揮作用，通脹將會見頂，至年底可降至4%。若承其貴言，下半年內地經濟軟着陸有望成為A股市場投資主題。

商品股宜計數食胡

回說上周五市況，內地公布數據後，A股市場表現波動，港股亦受累，恒指由上升逾200點，變成倒跌逾百點，尾市回穩，險守24,000點，收報24,008點，跌5點，主板成交722億元。展望本周，宜關注A股表現，而本周五本港復活節長假展開，此前市況頗大機會持續淡靜，恒指波幅料介乎23,800至24,300點水平。

市場對通脹的預期，推動金價再創歷史新高，銀價及油價亦創逾兩年新高。不過，投行高盛潑冷水，指投資商品嘅風險與回報已失衡，建議未來一至兩季減持商品投資。阿莊亦同意呢個睇法，揸商品股嘅投資者，亦不妨作為參考。

至於持倉股票方面，阿莊一直睇好嘅上實城市開發（00563）（下稱「上實城開」）有新消息。上海實業（00363）宣布以61億元，將上海城開（集團）59%權益及應收股息注入上實城開，後者將按每股2.8元發行21.8億股新股支付收購代價。完成交易後，上實於上實城開嘅持股量將由45%增至70%。換言之，上實城開日後再批盪集資擴充內房業務嘅空間相當充裕，而前大股東酈松校嘅持股量將由8.5%攤薄至4.6%，亦去除了後顧之憂。

重組概念仲有排炒

據披露，上海城開（集團）去年除稅後淨利潤6億元，加上今次上海城開全以發公仔紙支付收購，而代價股份作價貼近每股NAV，作為小股東應樂見其成。

再睇番上實嘅業務布局，未來直接經營嘅主業係基建及公路，鑑於近年A股市場受調控政策影響，不利本來分屬上實姊妹公司、從事內房嘅A股上實發展喺股市融資，造就機會讓上實旗下在港嘅上實城開上位。如今上實城開既已確立成上實拓展內房業務嘅平台，而上實亦正向母公司收購A股上實發展，未來喺上實嘅統籌下，旗下同樣從事內房業務嘅上實發展與上實城開進一步重組嘅機會甚大，即係話重組古仔仲有排玩。

上周五上實城開股價一度急升至3.26元，可惜市況唔就，最後收報2.95元。阿莊有感，如今上實城開嘅情況，跟○九年初嘅昆侖能源（00135）有幾分相似，山雞變鳳凰嘅日子，值得期待！

戰報

福田實業（00420）

史提芬上周四推介福田，當日低位1.63元，至上周五已抽升至1.8元高位，短短兩日已賺逾一成。

+16%

鴻寶資源（01131）

Sammi上周二睇中隻鴻寶資源，於當日低位1.12元跟佢上車，至上周五高位1.3元食胡，最多賺16%。