星展主席訪滬振軍心
星展近年銳意發展亞洲業務，內地咁大個市場佢哋當然唔放過。尋日星展集團主席佘林發拉大隊到上海，參加當地嘅「新加坡日」，夜晚更設宴招待客戶，仲請咗新加坡副總理黃根成出席。
佘林發承諾增投資
舊年星展中國成績唔錯，星展中國行政總裁張在榮話舊年賺咗2.6億元人民幣，希望今年可以再搵多啲，所以佢哋都密謀擴展，例如喺一三年前，將內地網點數增加到50個，單喺今年就計劃最少開多8家分行。佘林發就大派定心丸，應承集團會加大投資，大力支持星展中國嘅發展。
星展中國當然要請多啲員工幫手，張在榮話家陣有逾1,000名員工，計劃緊喺今年請多一倍人手。星展又同復旦大學合作搞課程，課程為期兩個多月，學生仲有機會到星展實習。