Fundman睇市：科龍趁低收集係時候

政府自從取消定期賣地，轉為讓發展商自由勾地，將土地供應的主動權交畀地產發展商，一直被輿論嗤之以鼻，見近期樓價直逼九七年高峰，公眾對地產霸權不滿全面升溫，特區政府終宣布考慮按季公布賣地計劃，增加土地供應透明度，變相回復以往的定期賣地。

今次政府出招，係咪就可以令到喺環球低息環境下，香港的樓市泡沫唔再繼續膨脹？由新地（00016）、長實（00001）等一線發展商，近期願意降價並加快推盤進度，至少可見地產商「唔憂賣」嘅心態有一定轉變，反而筆者擔心，特區政府短短年多內時間，由提高豪宅印花稅、降低最高按揭成數、短線轉讓懲罰性印花稅，到今次重新定期賣地，連番落重藥下，會有打壓過度嘅風險。事實上，半年內轉讓要畀15%額外印花稅之後，炒家經已絕迹，業主因為個人財政問題賣樓套現的靈活性已經大減，一旦樓市真係掉頭插水，到時唔知又有幾多人要政府出手托市！

筆者睇見今日香港，由政改方案鬧劇、充大頭申辦亞運、六千蚊唔派又派、到最近一鑊泡的最低工資，可以話全無章法，政策完全缺乏長遠承擔，試問市民點會對成功平衡樓市供求有太大期望？港人只能自求多福。

地產股較磚頭抵買

新政策出台，昨日地產股意外地無大反應，恒生地產分類指數最多跌過297點，收市微跌1點，報30,872點，回顧指數去年十月開始已一浪低於一浪，第一個高位在去年十一月的33,816點，之後一月中在32,369點又掉頭，今次31,390點已「頂到撼」。過去十幾年，兩次樓市高位，九七年及○七年地產分類指數市帳率分別達2.15倍，今日樓價在新高徘徊，但地產股平均市帳率僅1.15倍，比高峰期低五成三，似乎大孖沙經已考慮到特區政府亂出招下，樓市硬着陸的風險，但反而令筆者相信，地產股較磚頭抵買的事實。

股市靜候今日內地通脹數字，尋日大市成交縮到718億元，再創四月份新低，較搶眼的是中小型水泥股及家電股。海信科龍（00921）發盈喜，股價急升0.38元報4.6元，管理層預期首季股東淨利潤介乎9,060萬至1.13億元（人民幣．下同），同比升1至1.5倍，增幅未對重組注入資產的數據進行合併。調整後，首季淨利潤按年調整為0至50%，同大行估計相若。

自從母公司以12.38億注入白色家電業務，科龍業績的改善有目共睹，上月底公布一○年度業績，純利6.32億元大升2.04倍，每股盈利0.47元。

毛利壓力已被消化

科龍系作為中國最大白色家電生產企業之一，近年受惠家電下鄉、舊換新，到未來五年3,600萬間保障性住房推出應市，配合中央對內部消費行業的傾斜政策，白家電需求只會有增無減，銷售可以看高一線，但早前亮麗業績公布後股價不升反跌，說穿了，都係原材料成本上漲的預期影響。白家電生產涉及的銅、鋁、銅軋板等，近月價格升咗唔少，拆開去年上下半年睇，毛利實質由上半年17.99%收窄到16.73%。

不過經昨日大成交抽升，相信毛利壓力已消化得七七八八，創維（00751）及TCL（01070）等三月份銷售數字增長強勁，也掃除市場對家電行業的不少疑慮，預期市盈率6.6倍，應反映毛利短期受壓的問題，下跌風險有限，反之若原材料價格一如大市估計下半年回落，係時候開始低位收集。