股海實戰：雅居樂有條件炒落後

尋日市場盛傳內地三月份CPI增幅將達5.3至5.4%，或創三十二個月新高，惟見滬綜指表現理性，埋單僅跌7點，而港股市況亦只係窄幅偏軟，恒指守24,000點關，報24,014點，跌121點，主板成交下降至718億元，係好係醜好快有答案！

有家電股發季度盈喜，預視首季業績報捷，刺激股價做好，海信科龍（00921）升9%、創維數碼（00751）升9.43%、TCL多媒體（01070）升14.98%。個別水泥股亦見鑊氣，亞洲水泥（00743）發盈喜，股價急升12%。

農行可以睇位加注

仍留喺市場嘅熱錢在不同板塊間流竄，炒完煤股同本地零售股後，又再翻炒內房、汽車、水泥及家電等板塊。嚟緊又係內銀股季度業績期，可高度關注相關股份表現。尋日阿莊建議可睇位買入農業銀行（01288），上晝見大市低開，但其股價未有殺落4.5元樓下，已知道有料到。

反正前日才短炒沽出鐵貨（01029），個人對後市睇法唔係太淡，都想搵番啲貨揸手，加上內銀股季度業績期將至，所以忍唔住以平均價4.52元買入15萬股農行，總算不負所望，全日高位4.67元，收報4.62元，升2.21%，成交14.9億元，或會再睇位加注。

雖然近期領導人多番強調不會放鬆對房地產業嘅調控力度，但言論卻無損內房股升勢，恒大地產（03333）宣布首季度銷售額倍增後，股價持續做好，尋日創掛牌以來新高5.54元，收報5.48元，升9.38%，成交達到17億元。

同樣公布咗首季銷售數字，銷售額增45%至93億元人民幣嘅碧桂園（02007）亦唔輸蝕，股價創五十二周高位，高見3.85元，最後收報3.64元，升幅4.3%。

可以跟恒大及碧桂園相比嘅有雅居樂（03383），今年首季度銷售額增62%至94億元人民幣，相等於全年銷售目標嘅四分之一，表現並唔遜色，反映雖然中央調控政策繼續，但只要通過調整布局及主動優化結構等措施積極應對，相信集團未來仍能維持不俗嘅銷售表現。

成功發債增強財力

最近雅居樂股價表現相對平穩，與集團本月上旬發行五億美元換股債，對每股盈利造成潛在攤薄效應有關。繼標準普爾維持給予集團「BB/穩定」評級後，穆迪亦將集團嘅公司家族評級和高級無抵押債務評級由「Ba3」上調至「Ba2」，反映發債無損公司信貸評級。

反而，喺面對持續性嘅產業調控政策之下，成功發債嘅雅居樂財政將擁有更大嘅靈活性。

尋日雅居樂收市報12.56元，與五十二周高位13.52元尚有距離。既已消化發債消息，同類股炒到慶合合，照計雅居樂有條件後來居上，小注投機性跟進，目標上試13.8至14元區域，止蝕位11.65元。

戰報

金鷹商貿（03308）

金鷹股價近日呈強，尋日高見22.55元，較May上周三推介時低位18.46元，累計升幅超過22%。

+22%

亞洲水泥（00743）

史提芬上周四推介嘅亞洲水泥尋日發威，抽上高位5.46元，以推介日低位4.83元計，最多升逾13%。

+13%