股海實戰：遠東宏信有力挑戰9元

大市愈逼近25,000點關口，壓力愈大。日本地震後的V形反彈完咗，國企業績期炒得八八九九，美國QE2玩到六月底就鳴金收兵，大戶有乜把炮在餘下兩個多月時間，推高港股升穿24,988點的終極阻力？似乎仲係要睇短期中國公布的外貿及通脹數據身上。港股有波幅無升幅，尋日埋單跌3點報24,281點，主板成交稍為回落至871億，總沽空額51.1億，比前日回落近兩成二，三隻被淡友空得最勁股份包括盈富基金（02800）、平保（02318）及雅居樂（03383），都係近期表現唔壞，吸引大戶掉頭賭跌。

盈喜股繼續一枝獨秀，海螺A股再升4.9%，本地掛牌的安徽海螺（00914）升6%或者2.95元，報51.8元，股價去到○七年新高，睇番海螺一一年市盈率去到十七倍，或者唔少人嫌股價太高，但睇番整個水泥板塊，連同海螺在內大部分一二年預期市盈率不過8.5至12倍。

在保障房及大量基建動工的概念支持，水泥股應該未炒完，但估計資金可能短期會由一線轉炒二線股。阿莊心水包括台泥（01136）、亞洲水泥（00743）及金隅（02009）。

另一隻盈喜股中聯重科（01157），同樣出現AH同步抽升情況，昨急升7.1%或者1.5元，收報22.4元。中聯重科盈喜中預測首季淨利潤有1.3至1.7倍增長，達到17億至20億元（人民幣．下同），記得早前野村出報告估全年賺60億左右，第一季已經交到預測的三分之一，全年業績爆燈可期，市盈率十三倍，股價進入無阻力區，再升兩三成一啲都唔出奇。

比亞迪未脫弱勢

比亞迪（01211）見死貓彈，急升1.55元，報30.4元，理由係旗下汽車業務，三月錄得按月51%的強勁增長。阿莊奇怪大孖沙點解咁興奮，二月內地春節向來係買車淡季，用三月數字比較，大升是預期之內，如果比去年三月份，銷售實際大跌41%之多，管理層解釋係預留產能推出全新SUV車款S6車系所引致，但講乜都無用，一年前股價84元，今日得番三分之一，市盈率仲要貴過東風（00489）等一大截，要比亞迪擺脫弱勢，似乎要等電動車全面普及至有可能。

好多時新股招股，散戶蜂擁而上，公開招股大幅超額未必係好事，人人分得雞碎咁多，唔少都選擇沽咗算數，反而早前淡市，散戶唔玩大戶唔夠分的遠東宏信（03360），更具留意價值。

遠東宏信由中化集團分拆出來，主業是為客戶提供度身訂造的融資方案，主要提供兩類以設備為基礎的租賃服務，包括直接融資及售後回租，涵蓋六個行業，包括醫療、教育、基建、航運、印刷及工業裝備行業。掛牌六日升咗五日，據知今次招股期間股市氣氛麻麻，散戶認購遠不及配售部分熱烈，不少大戶獲配不足，搞到基金經理要掛牌後在市場掃貨，形成近日愈升愈有。去年業績勁升五成賺1.04億美元，保薦人之一的中金估計今年業績達1.46億美元，再升四成，市盈率18.8倍，以其增長幅度計一啲都唔貴，金融租賃行業選擇唔多，基金點都要捧場，相信短期有力挑戰9港元樓上。

戰報

卡姆丹克太陽能尋日搶高至4.32元，冼金基上周一推介時低位只係3.45元，跟到足可賺逾25%。

May周一推介嘅經緯紡機尋日最高升至7.6元，以推介日低位6.25元計，短炒勁賺超過21%。