張春江免職中移計足糧

曾任網通話事人嘅中移（00941）前副董事長張春江，由於涉及嚴重經濟違紀而受調查，喺舊年一月七日被免職，太子尋日睇中移最新發出嘅年報，發現中移作為大紅籌，做事相當均真，何解？因為中移都計番張春江做咗七日董事嘅人工畀佢。

做七日執董人工2.2萬

呢七日董事嘅人工，合共22,000元（港元．下同）。條數係咁計：3,000元董事袍金、16,000元薪金與津貼及3,000元嘅退休計劃供款，因只做咗七日，工作表現花紅梗係冇啦。

參考張春江在○九年唔計工作表現花紅共獲150.7萬元，去年所獲嘅「周薪」算是按工作日數嘅比例來支付，中移咁做都可算係夠晒公道。

太子話中移均真，唔係單靠一個case就咁樣講，中移嘅非執董Nicholas Jonathan READ 一樣做唔夠一年就辭職，中移都係按比例計番袍金畀佢，以「日薪」計，同前一年差不多。

至於其他執董，好似王建宙、魯向東、薛濤海等，袍金加埋其他收入，同○九年一模一樣，只有李躍因退休計劃供款稍為高過○九年，所以總收入先至有6%嘅增幅。