股海實戰：雅士利再無睇淡理由

發改委唔准康師傅（00322）加麵價，亦唔准煤企加煤價，中國要控制通脹，當然唔能夠單由限價方面埋手，在十五日公布三月份勢必「破五」的通脹數據前，人行又一次出其不意，唔等周六周日，在清明加息0.25厘，市場老早有心理準備，早加好過遲加，A股突破3,000點關口，帶動港股強勢再升134點，報24,285點，成交是今年第二次過千億，有1,043億元，顯見在內地金融緊縮政策明朗化下，基金經理都唔再等運到，開始積極入市。

鑑於油價因為利比亞局勢動盪，由85美元升到貼住109美元一桶，發改委尋日宣布調高成品油價，汽油及柴油今日起每噸升500元及400元人民幣，上次二月中加成品油價，中石化（00386）股價抽上8.07元，依家只係8元左右，捱緊價的股民，不妨把握今日開高減一減磅。

水泥股真係估佢唔到，升極都未夠，尋日安徽海螺（00914）發盈喜，估第一季股東淨利潤會比去年升1.5倍以上，消息一出股價曾經見過五十二周新高49.7元，最後收報48.85元。然而，對比本身規模大、營運效益較好的水泥一哥，唔少二三線水泥股更能受惠於水泥價格高企的好處，好似去年先剛剛虧轉盈的台泥（01136），勁升8.2%，山水水泥（00691）亦升5.8%。

阿莊睇中久沉的奶粉股，雅士利（01230）是內地奶粉業三強之一，○九年有7.6%市場佔有率，自內地毒奶及大頭奶粉等醜聞曝光，幾間奶粉股都來港上市集資，唔係為重新推廣品牌形象，就係計劃投資自建乳場，重建內地消費者信心，可惜係大戶似乎對奶粉股前途相當審慎，去年雅士利以4.2元招股上市，第一日就破發，之後輾轉跌到2.24元，連保薦行之一嘅美銀美林都掉頭唱淡後，股價才見起色。

獲批生產許可證

雅士利剛發通告指旗下全資子公司，包括廣東雅士利集團、山西雅士利乳業、黑龍江雅士利乳業及非全資子公司施恩（廣州）嬰幼兒營養品，全部在三月底前獲國家更新乳製品生產許可證，加埋首份成績表對辦，賺5.02億元人民幣，計落往績市盈率14.8倍，睇番乳業一哥蒙牛（02319）則為26.8倍，雖然兩者業務並不一致，但都屬行業領袖同內地消費類股份。生產許可證攞咗，業績出埋，應該無再唱淡理由，似乎大戶亦都趁中期業績之前的「安全期」，參與炒作，如果企穩3元樓上，阿莊都會搭番轉順風車，睇3.6元。

money18幫到你手

股民以往想睇免費即秒股價，只能夠上money18網站，但依家方便好多，用緊iPhone或者Android手機的用戶，可以下載money18應用程式，用手機可以睇到免費即秒股價，至於其他手機用戶，亦可以到m.on.cc，同樣睇到免費即秒股價，money18一於賣大包，益大家。

戰報

阿莊上周四推介嘅海爾電器，尋日高見9.87元，較推介當日低位8.5元，累計升幅逾16%。

孟瀛上周一睇中隻中國龍工，於當日低位5.22元上車，尋日在高位6元食胡，最多賺近15%。