百記舊將再戰濠江

「紅籌之父」梁伯韜當年打骰嘅百富勤，係當時最有規模嘅華資投資銀行，背後有一班資深華資投資銀行家，張國華（阿Ken）就係其中一個。

幫佳景出謀獻策

百記摺埋之後，大家各散東西，最近太子巧遇阿Ken，原來已加盟佳景（00703）出謀獻計，佢仲謙稱自己係助手而已。

Ken離開百記後，過檔殼王陳國強旗下坐鎮媒體投資，其後殼王淡出媒體，Ken張亦因此離開德祥系，近日陳國強再重投媒體，變化之大相信連佢都估唔到。

自從Ken張離巢後，市場鮮有佢嘅動靜。最近佢幫一家主打澳門餐飲公司佳景，職責係業務發展總裁，但太子見佢落足心機，似乎靜極思動。Ken張話晒係紅籌之父梁伯韜得力助手之一，佳景獲呢位財務高手幫手，太子心諗應該唔止搞吓新業務咁簡單。

佳景大股東係陳澤武，佢唔單只喺澳門有生意兼擔任多個澳門公職，佢仲係香港影視明星體育協會慈善基金嘅澳門會長，大家聽個名係咪好似同陳冠希老爸陳澤民好相似？但查實兩人全無血緣關係。