太子手記：永隆首創借錢買紅酒
香港係識歎之人嘅聚集地，當然唔少得捉緊搵錢機會嘅投資者。永隆銀行睇準機會，全港首創紅酒貸款，永隆零售銀行業務助理總經理鄧耀良（William）仲同太子講，呢種新生意已經發咗市，短期希望做夠5,000萬生意，再諗諗做多啲，甚至做埋「酒花」，希望可以改善吓銀行淨息差兼增加收益。
息價更勝做按揭
永隆今次推出紅酒貸款，貸款額最高500萬元或者酒價一半，William話，呢款紅酒貸款視乎係用供款定係借梗一個銀碼去計，息率由最優惠利率（P）減1，到P加1不等，年期就由三至五年不等。喺銀行個角度嚟睇，個息價真係靚過做按揭。
William話只做現貨，屬試驗性質，而且係根據買家向酒商訂酒嘅買價貸款，唔會跟市價例如拍賣價嚟做貸款額標準，亦承諾七日之內交到錢畀買家找數。香港○九年紅酒消耗量超過3,000萬支，上年投資紅酒亦贏晒買金同買股票，呢個市場真係大有可為。
鄧耀良（右）話紅酒貸款生意有得做。左為永隆按揭及私人貸款中心主管蔡爾全。