太子手記：賓架搞SHOW 為日賑災
香港賓架喺日本災後重建過程中找尋投資機會之餘，亦不忘為災民籌款謀福祉。太子聽講，一班賓架諗住搵全球最年輕搖滾結他手、兼且係健力士紀錄保持者宮澤佑門（Yuto Miyazawa）領銜，喺今個月十四日假中環四季酒店搞個慈善演唱會，並將所有收入捐畀喺美國註冊嘅日本協會旗下嘅地震救濟基金。
搵最年輕結他手演出
個演唱會啲門票就盛惠1,000大元一張，但係為咗做善事，各位歌迷應該無乜投訴。另外，演唱會仲有現場拍賣，拍賣品包括球王比利嘅簽名球衣、拳王阿里嘅連框人像照等。聽到個詳情咁吸引，算係半個「哈日族」嘅太子，都好想幫手出一分力。
雖然社會各階層都盡力為日本「打氣」，而「核恐怖」仍在擴散中，好多跨國投行都需要聘請核物理學家及專家，為員工及其家人提供心理輔導及潔淨食用水，以安撫其恐慌心理。