Fb搵白宮紅人 領軍IPO
全球最大社交網站Facebook估值愈來愈高，最新數字係超過600億美元，一旦上市，或會成為史上最大規模嘅IPO，唔怪之一直係市場焦點，監管機構更加對佢哋嘅一舉一動(目及)到實。有報道指Facebook有意聘請白宮前新聞秘書吉布斯，作為明年IPO嘅軍師。
薪酬料數百萬美元
消息嚟自《紐約時報》，報道話吉布斯會負責同傳媒、投資者及官方溝通及發布訊息。有知情人士指，由於雙方嘅磋商仍在起步階段，故未有正式聘書，甚至有機會告吹。
據悉， 吉布斯喺二月份離任白宮新聞秘書一職，計劃在轉職私人企業前，率先協助總統奧巴馬喺下一次總統大選中爭取連任，但Facebook正極力游說吉布斯加入公司。雖然雙方未有討論薪酬詳情，但估計吉布斯嘅薪酬將高達數百萬美元。
Fb擬請白宮前新聞秘書吉布斯為IPO嘅軍師。圖為Fb創辦人朱克伯格。（資料圖片）
白宮前新聞秘書吉布斯。