股海實戰：金山軟件估值夠吸引

港股尋日高開，恒指一度高見23,050點，但始終未能穩守其上，尾市現獲利回吐，結果收報22,915點，升89點，主板成交761億元。依照去年十一月以來嘅圖表走勢推斷，恒指上下波幅介乎22,100至23,800點，而現水平正處於唔上唔落嘅兩難局面，大企業業績期又已接近尾聲，後市方向變得更難以捉摸。

尋日升市，即將公布業績嘅內銀股可謂功不可沒，但會唔會係見光死，就不得而知。內地股市成交亦減少，滬綜指波幅僅16.5點，收報2,946點，微跌0.06%。

傳中信證券發H股

值得一提嘅係，停牌中嘅A股中信證券（600030）公布，因重大事項正在商談過程中，預計停牌不超過五個工作日，市場傳聞中信證券即將公告啟動H股發行計劃。若然消息屬實，中信證券將成為首家喺香港發行H股嘅內地券商（與早前只把境外資產在港上市嘅國泰君安（01788）有別）。選擇喺次季登陸港股，係咪對市況有正面啟示，就要等着瞧！

日本核洩漏事故仍在搶救當中，各國政府正嚴肅審視核能發展，有指德國政府正考慮放棄使用核能，以加快發展其他新能源作替代。

若然真係有西方國家正式宣布放棄使用核能，勢必打擊全球核能發展。咁嘅風頭火勢，入場博核能股反彈無異於赤身入火場，真係博唔過！

持倉中嘅港鐵（00066）尋日宣布，今年六月會按可加可減機制平均調高票價2.3%，股價收報28元，升0.1%。依家維修成本及工資都漲價，今次加幅算係務實，估計可順利過關的機會大。

業績股表現參差，華潤創業（00291）宣布去年度純利56.74億元，增95%，但股價跌2.9%；中遠國際（00517）去年盈利升50%至12.7億元，股價曾跌穿5元關，收報5.02元，跌幅6.5%。

派特別息提振股價

不過，金山軟件（03888）宣布去年度純利倒退3.8%至3.72億元人民幣，股價卻不跌反升，收報4.46元，升幅8.25%，成交1.2億元，相信與公司維持派發末期息每股0.15元外，另慷慨派發特別股息每股0.25元有關。

金山主要從事研發及製銷軟件業務，分娛樂及應用兩大類別。有別於去年並無新嘅遊戲發布，今年公司擁有五款擬上線嘅新遊戲，包括《月影傳說》、《熱血戰隊》、《蒼穹之怒》等，並會重點發掘基於移動平板電腦嘅休閒遊戲等商機。

至於推出金山網絡安全免費版，可藉着加入增值服務進一步改善用戶體驗，再加上國策持續加大力度支持本土軟件行業發展，公司前景應可穩步向好。

屈指一算，金山現價往績市盈率約十一倍，息率升至約九厘，估值確有吸引力，難怪基金入場掃貨，企穩250日線4.45元樓上，今浪可叩5元大關，3.9至4元乃主要支持區。

戰報

華潤水泥（01313）

尋日華潤水泥創7.47元新高，阿莊早於本月八日已經吼中咗，於當日低位6.46元上車，賺逾15%。

駿新能源（00091）

駿新能源尋日顯著做好，最高見過0.096元，較錢進上周二推介時低位0.076元，足足升逾26%。