布蘭克費恩作供爆私隱
對沖基金蓋倫集團涉嫌內幕交易嘅審訊喺美國進行緊，高盛行政總裁布蘭克費恩「紆尊降貴」出庭作證，竟然畀律師問好多私人生活習慣，真係冇晒私隱。
布氏用咗超過三個半小時作供，律師問嘅部分問題相當「無厘頭」，包括問佢喺邊度長大，同讀邊間高中咁，過去三周審訊期間從來冇證人被問及這些私事，佢惟有照答。
每日睇住高盛盤數
唔單止咁，律師仲問佢閱報習慣同管理風格，原來佢經常睇《華爾街日報》，又會每日睇住高盛盤數，鍾意用留言多過電郵，同埋當市況不穩時，會突擊同董事局成員單對單對話。
蓋倫聯席創辦人拉賈拉特南涉嫌○八年十月，從高盛前董事古普塔身上得到高盛將獲巴菲特注資50億美元，及高盛季度業績等內幕「貼士」，進行內幕交易圖利被捕。布氏作供指古普塔違反該行嘅保密條例。