Fundman睇市：國美憧憬佳績有得炒

日本核危機降溫，可惜歐美盟軍狂轟利比亞兩日，狂人仲未有倒台迹象，紐約期油掉轉頭炒，亞洲市一度升至每桶103美元樓上，限制了港股應有升幅。昨日大市開高100點後，午後靠石油及內銀股令升勢擴大，最後收報22,685點，升384點，不過成交比上星期五少一成六，反映大戶對後市仲係採取審慎態度。

美銀美林認為，上周五人行加存款準備金率50點子，再凍結3,600億元人民幣，應該對三、四月內地銀行新增貸款增長有抑壓作用，並估計人民幣七天拆息，會有幾日企响3%樓上，由於大銀行及小銀行準備金率，已分別去到20%及18%，美林相信再上調空間唔大，估計今年仲有三次50點子的調整。

昨日升市總覺得有點陰陽怪氣，期指開高220點後，一度被淡友狂掟，港股今浪已經大大落後，邊個咁狠在外圍普遍回穩之下仲要低位狂沽？筆者都想知答案！昨日推介的哈動（01133），有點失望是升幅不及上海電氣（02727）及東方電氣（01072），收報9.02元，僅較開市價9元高出兩格，應該和哈動本身「核電溢價」不及上述兩股高，大戶博反彈先揀另外兩隻有關。

哈動不難見10元

哈動去年賺10.24億元（人民幣．下同），增長69%，比綜合預測的8.6億元高出近一成九。大摩報告話哈動是中國核能項目叫停下的受惠者，目標價10.46元，睇法同史提芬相似，火電仍然是哈動最大收入來源，中國唔用鈾而繼續用煤發電的話，對哈動其實都有好處，10元的目標應該好快達到。

中央五年內要建3,600萬套保障房，瑞銀認為政策中長線對多個行業都會得益，包括鋼材、水泥、建築、工程機械及煤炭行業。瑞銀認為鋼材行業會因為政策而額外有2%的需求增長。另外，建築離不開水泥，海螺（00914）及B股上市的華新水泥（代號600801）都相對具有優勢，水泥行業能持續兩年以上的復甦，瑞銀認為海螺具購併潛力，A股上市的冀東水泥（代號000401），盈利改善幅度最理想。

受惠興建保障房

唔知看官有冇返內地探親，內地豪宅區大都係烏燈黑火，炒樓大款純粹囤積居奇，買私樓養老鼠情況比比皆是，居民保障房就唔同，乃民生所需，入住率有保證，3,600萬間保障房意味着至少需要3,600萬個雪櫃、電視、洗衣機及冷氣機（乘以房間數目），可以想像，無論是家電上游生產到供應鏈下層的零售銷售都會受惠。

這令筆者想起早前因為主席變動，股價由3元以上跌至2.34元的國美（00493），公司下星期一出業績，坊間預測盈利介乎16.11億至21.71億元，平均預測是19.32億元，每股賺0.121元，市盈率18.2倍。

過去幾個月公司雖然風風雨雨，可是睇番營運數據，同店銷售及毛利表現卻是續有改善，相信業績達標甚至超越預期的可能性唔細，保守預測今年業績增長兩成五至三成，「抵買指數」PEG遠低於1，只係0.66倍，趁市場無古仔炒，開始留意番保障房概念，國美應有作為。