股海實戰：中交建重估引發升浪

日本核電洩漏事件有進展，惟尋日上晝恒指僅高開100點，幅度比預期細，反映投資者入市態度仍十分審慎。埋單恒指收報22,685點，升384點，主板成交741億元。阿莊依然相信，月底前港股波幅會擴大，要做好心理準備，恒指仍有機會下試22,000點水平支持。

上周初熱炒嘅風電及太陽能股抖緊氣，部分游資回流至極度超賣嘅大價股博反彈。煤炭股持續強勢，中國神華（01088）、中煤能源（01898）及兗州煤業（01171）升幅介乎1.8至3.1%，而福山能源（00639）亦有2.8%升幅。

汽車股氣氛亦有改善，長城汽車（02333）、吉利汽車（00175）、東風（00489）及比亞迪（01211）均告高收。利比亞局勢未明，國際油價反撲，石油股亦借勢反攻，中海油（00883）及中石油（00857）同升逾3%，就連從事下游業務嘅昆侖能源（00135）亦升逾5%，短線若能乘勢突破12.84元，可確認調整完成，並重展新升浪，可以多加關注。

政府已預留啟德停機坪北土地，配合市建局旗下重建項目新增「樓換樓」安排，並引入業主提出重建或邀市建局重建嘅方式，咁講法受影響業主多咗一個選擇，料有助加快市區重建步伐。見尋日田生集團（00183）及金朝陽集團（00878）股價分別升4%及7%。

但阿莊諗落，若然業主可以採取主動自行提出或邀市建局參與重建，對於一直從事重建項目中介服務嘅私人機構未必係好消息，皆因變相多咗個好大嘅競爭者！至於今次「樓換樓」安排，涉及僅1,000個中小型單位，相信對整體樓市供應影響有限。

留意吸納H股機會

將焦點轉移到內地市場，大型內房股持續反彈，中國海外（00688）升3.8%、恒大地產（03333）及保利香港（00119）均升逾4%。

最近阿莊同表叔線人飯敍，當然把握機會問吓北水動向。呢位表叔話，依家內地樓市完全冇得炒，大批閒置資金冇出路，部分轉投香港樓市，但更多係保持觀望，正密切期待重投A股市場。

佢仲話，今年A股轉捩點好可能喺第二季出現，並着筆者多關注H股表現云云。H股之中，內險股中國人壽（02628）正處於○九年七月以來嘅低位，阿莊亦心郁郁，正密切留意吸納機會。

嚟緊內地會繼續大搞基建水利，以刺激就業及推動內需，基建股屬既可攻亦可守嘅股類。中交建（01800）去年業績理想，因首發A股嘅關係，公司就今年業績發盈喜，預示盈利前景樂觀，故見大行積極推介，重估潮引發股價大反攻，股價由5.5元水平升至近周喺250日線7元關進行整固，尋日再現突破，收報7.27元，升5.21%，成交高達7.78億元。由於走勢偏強，料可反覆向8元關推進，10日及50日線支持分別喺6.9元及6.4元，可以睇住嚟炒！

戰報

亞洲能源物流（00351）

志強本月七日吼中隻亞洲能源物流，尋日發威，抽高至0.147元，較推介當日0.123元，累升近兩成。

合景泰富（01813）

內房股翻炒，史提芬上周一推介嘅合景泰富尋日高見5.73元，較推介日5.01元，累升超過14%。