樓市八爪魚：年輕人買樓早部署

近呢兩年，「難以上車」突然成為咗一個嚴重嘅社會問題，「買樓」就好似同「讀書」、「拍拖」、「結婚」、「生仔」一樣，係一個人生必經嘅進程咁。尤其係一班年輕人，每每都會鬧爆政府，唔幫佢哋置業。望住樓價日日係咁升，短期內進身做業主嘅機會愈嚟愈渺茫。

Paul少唔知究竟置唔到業，人生係唔係就會有遺憾，但肯定嘅就係，會少咗一個短期置富嘅機會。早幾日，有間銀行出咗個香港百萬富翁嘅報告，顯示香港有好大批人，身家都係靠樓價升值而暴升，咁就更加難免會令一班「捱緊世界」，又冇機會「上車」嘅年輕人睇到眼火爆。

姑勿論大家希望置業背後嘅理念，係想生活安定啲，定係想投機搵大錢，但既然樓價已經開始同大部分市民嘅「上車」能力脫節，政府亦真係應該做啲切切實實嘅嘢。不過，政府喺房屋政策上進退失據，淨係畀過去嘅歷史牽住走，終於到依家預算案畀人鬧爆嘅「風頭火勢」之下，先至肯「死死氣」話考慮復建居屋，係唔係太過後知後覺呢？

買私樓變奢侈投資

Paul少喺呢度已經講過好幾次，樓價升到呢個地步，私人住宅已經係一種奢侈嘅投資，寄望可以透過私樓市場，去解決上車客訴求，根本係不切實際。如果推出置業資助，更加係為樓市火上加油，夾硬製造更多購買力出嚟。復建居屋，先至係可行，因為可以為一啲能力有限，已經跟唔上私人市場嘅上車客，提供一個stepping-stone（踏腳石）。

不過，就算政府唔玩「拖」字訣，真係肯落實復建居屋，供應亦都唔會一下子就出到嚟，要上車嘅年輕人，始終都要等多幾年。Paul少認為，有心置業嘅年輕人，亦都應該為供樓呢項「持久戰」做好準備。

好多未上到車嘅人，見到個報告話唔少香港人靠層樓成為百萬富翁，可能既羨慕且妒忌；但係好多百萬富翁業主，為咗供樓，過咗十年八載嘅節儉生活，呢啲又未必每個人會留意得到啫。

為供樓須知慳儉

年輕人就算有機會「上車」，但又可唔可以為咗層樓，改變自己一貫嘅生活模式呢？可唔可以為咗層樓，唔再一年換一部iPhone；唔再個個月去睇演唱會，睇完一場又一場；唔再一得閒就同朋友唱K消夜；唔再動不動就搭的士返工；唔再成日諗住今年去日本，明年去歐洲……呢啲可能先係會唔會「上車」嘅關鍵。

老實講，如果自問冇咁嘅毅力去克勤克儉，咁就算政府復建居屋，你最終都未必可以因此而「安居樂業」，更加唔好諗進身做百萬富翁。