Fundman睇市：空軍收歛後市毋須悲觀

利比亞狂人卡達菲向反政府軍反攻，冀重奪東部石油出口港不果，刺激紐約期油前晚升至102.4美元一桶，乃兩年半高位。

除咗產油國之外，恐怕全世界都唔想油價繼續向高位推進，新興市場忙於為通脹失控四處撲火，巴西加息，估計下星期輪到南韓，五月份澳洲會否提前加息仲係未知之數，大行估計，假如油價未來三季企在120美元樓上，全球通脹會升1至1.5%，對新興市場不利，而對經濟復甦仲係相當脆弱的歐美就更係麻煩之極。

早前聯儲官員放風，叫市場做定加息心理準備，估唔到伯南克出來唱反調，前晚指聯儲局唔排除會再擴大購買資產計劃的規模，暗示若然六月底前結束的QE2唔掂，仲有QE3跟住嚟。不過，市場對美國經濟一再落重藥都醫唔番，開始失去耐性，至少市場對伯南克的言論，就唔及去年八月提出QE2時咁興奮，美股前晚升得8點。

恐慌指數持續攀升

值得留意，恐慌指數（VIX）近期由16水平樓下，回升至20.7，仲有繼續攀升之勢，道指10日線（12,186點）轉弱，與20日線（12,184點）愈走愈近，一旦跌穿，美股勢轉弱，莫非今年唔係sell in May，而係提前變咗sell in March？

港股真係唔爭氣，A股升、美股升佢唔跟，到今日兩市強勢初見逆轉，「兩會前例升」藉口又用完，A股好友昨日午市已見鳥獸散，恒指由一度升281點，到午後縮到得番73點進帳，收報23,122點，走勢相當肉酸。

唯獨一點值得留意，空字派基金連續兩日狂隊之後，沽空活動稍為收斂，大市成交升6%去到744億元，沽空額卻不升反跌30%，得番40億元，似乎後市仲未需要睇得太差。

中信泰富（00267）出業績，全年盈利89.15億元，增長49.8%，乍看之下似乎遠超預期的60億至76億元，但業績中包括出售非核心資產的30億元收益、投資物業公平值變動收益12.94億元（○九年才9,000萬元）、還有來自匯兌收益亦有3.35億元。

然而，細看各主要業務的溢利貢獻部分，表現均在預期中上限水平，核心三頭馬車，特鋼貢獻升48.5%，能源項目升121%，攤佔大昌行（01828）收益升92.7%，僅是中港兩地地產投資持平，就連佔總收益比重唔大的隧道投資（5.6%），溢利都有14.8%增長。

中信泰富現價吸引

中信泰富截至去年十二月底止，總負債按年上升27.6%，至838.5億元，減去現金及銀行存款245億元，淨負債593.5億元，淨負債率由前年的42%上升至46%。管理層表明資本投入高峰期近尾聲，隨着鐵礦及房地產項目資金回籠，負債可望回落，但未有為繼續出售非核心業務定出時間表。

由成績表可見，「其他投資」資產規模減少，可見將來未必再有大筆溢利出現，不計這項目及重估資產盈餘，中信泰富的持續經營業務收益應在57億元左右，現價21.55元，市值786億元、市盈率13.8倍。

觀乎特鋼增長期未過，大昌行已變成系內現金牛，現價應有一定吸引力，尤其與其他大型紅籌公司相比，中信泰富仍然有一至兩成折讓，業績之後，短期見24至25元左右，問題應該唔大。