滙控火星人角度 揀總部
大家都知滙控總部設喺倫敦，但主席范智廉竟然同傳媒講佢哋來自火星？原來今年滙控會重新審視總部設立地點，范智廉話呢個審視每隔三年一次，每次都要當自己從火星而降，評估邊處地方先最適合佢哋呢家國際金融機構。
無意仿渣打印度掛牌
市場猜測咗好耐滙控會唔會搬總部，加上之前范智廉公開話關注英國嘅銀行稅，可帶來25億英鎊嘅額外支出，更加令傳言滿天飛。范智廉就作出解畫，話佢哋從來都無講過會搬離倫敦。
范智廉話滙控已經喺5個交易所掛牌，無打算倣效渣打（02888）咁，以預託證券（IDR）形式喺印度掛牌，不過如果以子公司形式發展，更有利進入印度市場嘅話，佢哋就會樂於採用。