董偉幫夥計諗包伙食
過埋今日，各位金魚缸從業員要「加辛」喇，皆因港股下星期一開始加時，真係要做好心理準備。股壇前輩，眾利股票公司主席董偉細心提醒各位手足，要小心身體。
星期一開始，早午開市時間各提早半個小時，太子認識嘅好多輪商、證券行老友都話齊齊校定鬧鐘，飲多杯咖啡等開鑼。
食得急怕影響健康
喺六十年代自立門戶嘅董偉，成立股票公司做「揸fit人」，話晒躋身本港股壇逾半個世紀之多，所以佢覺得今次交易時段進行世紀性改革，技術上無咩大問題，只係班夥計食飯時間縮短咗，出去食飯要「食快啲」，變相可能辛苦咗個胃，影響健康喎。
佢話公司一直都提供午膳津貼畀員工，依家仲諗緊包埋伙食添。「中環下午食飯不嬲都人多，睇吓港股加時頭嗰一兩日會點啦。依家都有搵伙食公司傾，到時啲員工自己揀出去食，還是留喺公司食都得。