股海實戰：津發上車有心未算遲

剛公布去年業績嘅大笨象（00005）失威，昨日股價挫逾半成，成交額高達84.6億元，恐怕今轉有排抖！幸好騰訊（00700）及中移（00941）撐場，加上本地地產股及內銀股偏穩，恒指得以報升58點作結，報23,396點，大市成交828億元。

騰訊確認新升浪

阿莊兔年首隻推介股份──騰訊，喺190元水平震倉搞咗大半個月，尋日終於見真章，股價創歷史新高212.8元，收報211.2元，升2.52%。公司將於本月十六日宣布末期業績，由於股價向上阻力冇位睇，只有順勢而為，但理論上守住205元可確認進入新升浪。

內地二月份PMI為52.2%，環比回落0.7個百分點，但回落幅度按月明顯縮減。滬綜指企穩喺2,900點樓上，收報2,918點，升13點，滬、深股市交投持續增加，反映確有長錢流入支撐。但阿莊更關心嘅係，當「兩會」呢個安全期成為過去之後，本月底嘅季結會否再有一番好淡爭持，故當恒指反彈至23,500點樓上，必需要謹慎看待持倉風險。

尋日提及嘅中國光大國際（00257），業績公布後市場反應唔錯，股價曾高見3.86元，收報3.82元，升3.8%。繼續睇吓紅籌股，阿莊被天津發展（00882）幅走勢圖吸引住，事關一月份股價見五十二周高位7.74元後回落，至6.5元水平現承接並營造出圓底，近兩周股價反覆做好，已重上50日線，尋日更以全日高位7.32元收市，升4.72%，成交增至3,207萬元，料好戲在後頭！

估值有提升空間

津發為天津市政府窗口公司，有着老牌紅籌嘅特色，就係業務周身刀，但冇張利！至近幾年，不少大紅籌都開始配合母公司進行重組，優化資產，津發亦不例外。如今公司明確以公用設施業務（包括供應自來水、電力及熱能）、商業房地產（主要係酒店業務）為主軸發展，附以其他策略性投資，如釀酒業務、升降機及扶手電梯，以及提供港口服務。為配合重組，去年二月初起，旗下天津港發展（03382）由附屬變為聯營，並陸續安排將公路項目售回母公司，換回26項位於深圳及天津嘅物業投資。

阿莊相信，經重組後嘅津發，業務架構及發展方向更為清晰，且更能捕捉環渤海經濟區嘅發展機遇。上月中旬，津發取得20億元嘅貸款，為期六十個月，唔排除正為收購其他資產作準備，相信注資概念會係今年嘅投資主調。

再對比其他大紅籌，上實（00363）及北控（00392）較早起動資產重組，盈利表現有明顯改善，故市場給予嘅估值亦相對較高，現價市帳率分別為1.2倍及1.6倍。反觀津發，現價市帳率僅0.88倍，但只要今年落實更多收購行動，相信不難重獲基金大戶垂青，上車有心唔怕遲！

戰報

茂業國際（00848）

May眼光獨到，上周五吼中嘅茂業，尋日高見3.33元，較推介當日低位2.89元，累升超過15%。

明輝國際（03828）

姚午齊上周四冷敲隻明輝，真係畀佢貼中，以當日低位2.48元計，至昨日高位2.73元，累升逾10%。