高盛前炒王 基金准開檔

高盛前星級交易員施家文離職後創立嘅對沖基金Azentus Capital Management，終於獲得香港證監會批准，已經喺二月二十一號正式攞到牌，據講，隻基金會募資至少10億美元，會喺第二季營業。

太子即時走去八吓隻基金仲有咩猛人，結果發現總共有五位負責人，除咗施家文，仲有對沖基金Boyer Allan嘅前首席執行官Roger Denby-Jones等，而另外四位都係施家文喺高盛時嘅班底，睇嚟大家嘅投資理念相近，至會再走埋一齊。至於佢哋個竇，就安置咗喺中國工商銀行大廈嗰度。

買樓眼光一樣掂

施家文年紀輕輕，只有四十五歲，九三年加入高盛，曾經係全球最高收入交易員之一，○六年度收入高達1億美元，較高盛舵手布蘭克費恩還要多逾一倍。佢唔單只搞對沖基金叻，投資物業仲叻過好多炒家，佢喺○九年首季，趁金融海嘯後樓價大幅滑落時，購入大潭道Rosecliff一幢洋房，市場估計已升值六、七成。