李寧印錯商標無心惹禍

李寧（02331）近期負面新聞多多，繼CEO張志勇遲交股權披露資料被罰錢後，今次就被內地媒體話，旗下嘅「上海心動體育用品」公司運作三年多，原來冇喺上海工商局註冊，而冇註冊就出售產品會涉及虛假宣傳。

李寧發言人即時澄清，指已經做咗商標註冊，所以冇違法。又解釋，出現誤會是因印刷錯誤，誤將標籤及鞋盒上的「心動」印為「新動」。太子估，唔通係「心動」及「新動」國語發音相似所以搞亂咗。

內地媒體報道後，李寧澄清「上海心動體育用品」係負責「心動」品牌嘅日常運動業務，亦有註冊。今次出現呢個誤會，主要係舊年第三季產品要更換標籤，印刷出現問題，公司已暫時停售印錯標籤嘅產品，上咗架會回收，所有印錯嘅產品會銷毀，而公司產品設計同品質不會受影響。

拖累股價跌逾2%

自從李寧舊年重塑品牌後，噩夢就接踵而來，首先係非凡中國（08032）收購李寧受阻、後有訂貨會定單下跌，遭基金洗倉股價大跌等，今次呢個誤會亦令到李寧昨日股價跌逾2%，太子希望佢哋嘅厄運快些過去。