股海實戰：國藥可繼續跑贏大市

上周期指結算前夕，淡友再度發功，恒指一周高低波幅超過1,000點。上周五市況出現反彈，恒指重上23,000點邊收市，報23,012點，升411點，惟觀現貨反彈力度有限，大市成交降至不到700億元，相信反彈純粹由期指轉倉活動帶動，後市表現尚未許樂觀。事實上，見到上周遭洗倉嘅基金股跌時成交大增，但反彈幅度及成交唔算太大，撈底者要提防食「彈散」﹗

再睇番期指，淡友托住指數喺23,000點邊轉倉，恐怕唔會質落22,400點就夠喉，故除非資金面有重大變化，否則三月份恒指下試250日線21,900點水平嘅可能性不能完全抹煞，而翻查資料，收回價介乎21,900至22,400點嘅恒指牛證尚有逾60隻，話唔定嚟緊仲有「宰牛」行動！

內銀積弱有原因

聽表叔講，今年中國人行好大決心控制通脹，收緊市場流動性之舉唔會手軟，估計要將存款準備金率上調到22至23%先至會停手。以目前存款準備金率已處於歷史新高19.5%，再按每次調升幅度0.5個百分點計，即係話年內人行分分鐘仲有六至七次調高存款準備金率行動，輔以兩至三次嘅加息機會，表叔們都要做定心理準備過吓緊日子！內銀股表現持續疲弱，正好反映呢份預期。

缺「水」係當今兩地金魚缸嘅最大難題，從另一角度睇，本來以為三月份IPO活動重現，會吸引部分資金重臨停泊，誰知至今為止，都聽唔到有大型新股部署喺三月份啟動招股活動，所以結論都係得一個：首季結算前繼續捧淡友場贏面會較高。

呢期股海人心虛怯，一有咩風吹草動就惹來沽盤湧現。好似上周市場傳出恒大地產（03333）缺水，股價即被狂質，曾低見3.3元，好在管理層處理危機有水平，立即會見分析員，詳細解釋二月份銷售數據及財務狀況以闢謠，故見上周五其股價曾反彈上3.53元，收報3.43元，升1.7%，成交2.25億元。

內房實力受考驗

展望今年內地房地產市場仍然受到政策調控，喺成交量減少之下，內房企業現金流勢必受到影響，財政實力將受到考驗，所以即使遇上有銀士話睇好內房股長遠前景，想逢低收集，問阿莊有咩好冧巴介紹，除咗中國海外（00688）、華潤置地（01109），同埋有上海市政府旗下嘅上實（00363）及上實城市開發（00563）外，其他都冇咩特別心水。

繼續睇吓啲大晒士股，早前獲摩通唱好嘅國藥（01099），上周股價表現強於大市，周五收報28.1元，升4%，成交1.54億元。

上月底，國藥斥資13億元人民幣收購河北省最大藥品分銷商，投行睇好公司日後將繼續充當行業購併嘅主導者，加上今年中央將加大對醫療改革嘅投入，國藥發展前景穩定，相信股價可繼續跑贏大市。

上周阿莊減持股票增持現金，但選擇沽出嘅中航科工（02357）及信義玻璃（00868）純粹因為流通性較大而且帳面有利潤，並非睇淡其前景，若三月份大市再現大幅波動，都會留意喺低位翻兜嘅機會。

戰報

重農行（03618）

重農行連日做好，錢進早於本月十八日已經吼中，跟佢於當日低位5.35元上車，上周五升到5.99元食胡，賺近12%。

昂納光通信（00877）

Sammi上周四推介隻昂納光通信，當日低位只係5.18元，翌日已隨大市回升，高見5.58元，短炒一轉，都賺近8%。