照顧基層 惟建居屋

今年財政預算案唔單止冇驚喜，嗰種「政府富有即係市民富有」嘅歪理，直頭令人憤慨。如果真係如政府所講嘅話，咁請問Paul少又可唔可以就咁揸住張身份證，走上嚟政府總部「提款」呢？身為決策高官，講嘢唔用腦之餘，亦都唔尊重市民。

講番正題，喺現時通脹高企之下，財政預算案對於小業主嚟講，所得嘅「小恩小惠」，就只有減免差餉、電費補貼等等。尋日有人同Paul少「發偉論」，話呢幾年樓價勁升，小業主帳面身家都已經水漲船高，而且現時供樓利息低，又唔使捱貴租，點都好過啲無樓揸手嘅小市民，所以預算案中照顧冇咁多，都好應該喎。

樓價漲自住無着數

Paul少覺得呢種言論好有問題，亦都係喺有樓階級同埋無殼一族之間製造分化。老友，香港大部分業主間屋都係用嚟自住，每月畀嘅供款，同租樓實在唔會差得好多，所以就算樓價升咗，亦都只係『帳面』嘅數字遊戲，根本唔可能隨隨便便咁賣樓，負擔亦唔會因為樓價升咗而減輕，何來會係唔需要照顧呢？當然Paul少亦都認同，現在最緊急需要幫助嘅，係一班低入息、負擔重嘅小市民；但係就唔應該以有樓定係冇樓揸手嚟界定一啲福利。

細盤豪宅化 無助上車

預算案公布之後，政府都順勢公布埋嚟緊財政年度嘅賣地計劃，結果一如所料，政府又係用主動賣地增加供應，同埋限制某啲地皮起細單位嗰幾招嚟抑壓樓價。Paul少喺早前政府推出前元朗邨地皮時，都已經解釋過，純粹增加私人市場嘅新供應，並唔係一個有效辦法令樓價回落，因為喺私人市場裏面，就算係細單位，經過地產商包裝推出市場之後，根本已經同現時嗰班等待上車小市民嘅購買力脫節，政府唔提供資助，根本就買唔起；但如果政府推出置業資助，就等於為市場製造更多需求，推高樓價。所以，復建居屋，為能力有限嘅小市民提供置業踏腳石，先至係解決方法。

增將軍澳地有發圍

另外，下個財政年度賣地計劃總共有71幅地皮，除咗何文田、前北角邨地王為市場關注之外，Paul少亦都留意到另一個熱門地區，就係發展多年嘅將軍澳，今次就總共有七幅地皮納入賣地計劃，亦意味着將軍澳市中心嘅發展正式啟動，下個禮拜，Paul少就同大家討論一下將軍澳樓市嘅前景。