華為要美國 還清白

一直披住神秘面紗嘅華為，貴為全球第二大電訊設備供應商，但喺印度、美國都畀人質疑佢哋可能危害人哋國土安全，英國甚至唔敢要佢哋送畀倫敦地鐵價值5,000萬英鎊嘅地下網絡訊號。華為終於忍唔住，前幾日喺網站發聲明澄清長期不實嘅謠言，仲歡迎美國正式調查自己添。

嗰封聲明係由華為副董事長兼華為美國董事長胡厚崑發出嘅。佢話華為投資美國10年咁耐，員工已經超過1,000人。但部分人對華為有誤解，包括知識產權糾紛、中國政府嘅財務支持、同威脅美國國家安全等等。

胡百崑話，華為係八七年喺深圳成立，係一間由員工百分之百持股嘅私營企業。傳言話華為同解放軍有「密切聯繫」，係因為華為創辦人兼CEO任正非曾經喺解放軍服役。佢猛話服過役嘅CEO，無論係中國定美國都好平常，根本無任何證據指華為同軍方技術有關。

若有誤解 歡迎調查

華為將謠言逐項澄清，希望美國對華為所有嘅質疑做正式調查，幫華為平反，證明佢哋係間真正嘅商業公司。姿態做晒係啱嘅，但係啲美國人又會唔會查呢？