韋奕禮臨別外訪交足貨

證監會行政總裁韋奕禮臨別秋波，將於下星期聯同財經事務及庫務局以及金管局去美國紐約推介香港，如無意外，今次應該係韋奕禮任內最後一次參與大型官方訪問活動，佢除了會喺下周二嘅「重頭戲」國際研討會上發言外，聽聞投資推廣署已喺美國幫佢安排咗最少五個當地傳媒訪問佢。睇嚟，佢今次行程都會非常緊湊，絕不輕鬆呢！

太子覺得，韋奕禮始終喺香港工作多年，對香港有一定感情，佢最後一次以證監會行政總裁身份宣傳香港，仲係咁落力一定留番個美好印象給大家！

韋奕禮早前就同太子講，離別在即，六月八日係last day，感覺真係好唔捨得香港。

將研香港經濟角色

下個禮拜嘅國際研討會將會喺紐約廣場酒店舉行，屆時將討論兩個主要議題，第一個係香港作為通往中國內地嘅門戶和喺全球經濟所扮演嘅角色；第二個係香港作為亞洲主要資產管理中心嘅發展。

除了韋奕禮外，財庫局局長陳家強同金管局副總裁余偉文，亦會喺研討會上發言。

研討會其他講者仲包括來自德意志銀行、瑞信、高盛、大摩及滙豐等代表。