股海實戰：中興通訊 回氣再炒上

財爺發表財政預算案，本來打工仔滿心歡喜，以為嚟緊個人入息稅可以獲得寬減，誰知好夢成空。中產受惠主要係強「輸」金獲注６隻金牛，另電費補貼上限一千八百大元，有樓者就附送差餉寬免，有子女或有供養父母者免稅額獲調高，總之「有好過無」。

政府唔直接派錢，理由係唔想引發通脹，但阿莊總係唔明，如今交通費用佔去普羅市民收入一定比重，從市區過海返工唔食唔飲一日閒閒哋都要廿蚊，新界過海來回分分鐘要開雙添，點解唔從呢方面着手減輕吓市民負擔？

至於市場關注嘅土地政策問題，一如所料，今年會增加賣地及勾地表土地，預計下一財年嘅私宅供應量將達到三至四萬個，而講咗有一段時間嘅置安心計劃將於明年起啟動等。

阿莊唔敢全盤否定呢啲政策對於調控樓市供需關係嘅作用，只覺遠水豈能救近火，樓價因相關政策而出現較大幅度調整嘅可能性不大，而能否實現政府所預期嘅供應量，天曉得，即使最終冇實現，又有誰需要負責？

講到底，阿莊深信，現任特首在任日子唔多，唔想做太多干預市場嘅行為，免重蹈前任覆轍。未來樓市會否出現真正嘅大調整，主要視乎兩大因素，包括低息環境何時逆轉，以及投放喺本地樓市嘅內地資金，會否因為內地水緊而沽出港樓套現，班水北上！

中東局勢緊張氣氛未退，美股前晚急挫，但港股前日經已跌定先，所以見到尋日跌幅略為收斂，恒指收報22,906點，跌83點，大市成交655億元。恒指走勢疲弱，好在尋日內地A股回穩，滬綜指收報2,862點，升7點，阿莊對於兩會前A股表現成港股定海神針尚存希望。

基金股繼續遭輪流洗倉，尋日見到ASM太平洋（00522）急跌逾5%，收報102.5元；金鷹商貿（03308）跌近7.1%，收報17.54元；中國南車（01766）及南車時代（03898）分別再跌4.7%及6%。係咪鐵道部高層被撤職調查事件有手尾，不得而知，阿莊持倉尚有中國南車，勝在手貨成本夠平，但都希望鐵道部大地震嘅餘波快了。

數碼通拆細有得炒

本地電訊股數碼通（00315）派發成績表，中期賺3.21億元，增長1.8倍，每股盈利61.6仙，派發中期息62仙，另１送１紅股，做佢股東真係飲得杯落，相信股份變相拆細之後仲有得炒吓。

講開電訊股，內地電訊設備股尋日普遍逆市靠穩，龍頭股中興通訊（00763）高位曾見34.8元，收報33.85元，升0.89%，成交1.92億元。

按中國會計制度，中興去年實現純利32.54億元人民幣，增幅32%；年內合同銷售額1,000億元人民幣，增幅26%。最近有消息引述管理層指，公司正跟進對北電網絡資產嘅競購工作，特別係着眼於北電嘅LTE和其他4G技術資產，成事與否有待觀察，但見上周有大行入場增持中興股份，相信係睇好公司盈利增長前景，且具購併海外資產概念。

過去兩周，中興股價由30元邊搶高至35.65元，前日股價隨大市調整，尋日止跌回穩，相信整固過後可創新高，10日線及50日線支持分別喺32.58及31.21元。

戰報

志強上周一推介嘅超威動力逆市開車，尋日最高升抵2.98元，較推介當日低位2.62元，累計升幅近14%，認真和味！

錢進周二吼中隻中國聯盛，當日低位只係0.255元，尋日一度抽上0.29元高位，短炒獲利近14%，果然眼光夠準。