冼國林北上搞「夢工場」
功夫及財技同樣了得嘅國藝（08228）主席冼國林，自從舊年娶咗個靚靚老婆羅寶兒後，好快仲扶助老婆做埋副主席，一於拍住一齊打天下。唔知係咪巧合，就連國藝嚟緊一個大型項目「西樵夢工場」，都係喺老婆家鄉佛山搞。冼師傅話，呢個「西樵夢工場」項目得到當地政府大力支持，就連當局去招商都以呢個做賣點，同時項目已經帶動當地樓價上升咗三、四成，都有少少可惜早前冇買番幾間添。
選址西樵涉資8億
講番呢個「西樵夢工場」係集合咗影視拍攝基地、酒店、主題樂園同天然湖泊於一身，目標打造成為中國首個環球影城式主題公園，整個項目需要8億元，會分階段投入同落成嘅，冼師傅就話好有信心呢個項目嘅發展前景，已有公司接洽拍片。
另外，公司其他業務方面，冼師傅表示嚟緊拍完《葉問終極篇》後，未來會繼續拍功夫片，弘揚中國武術文化。
冼國林對「西樵夢工場」嘅發展前景好有信心。