太子手記：歐智華聘約惹避稅疑雲
滙控（00005）新CEO歐智華上場無耐就有勁多傳聞，一時傳佢將行政總裁辦公室搬返倫敦，一時又話佢花紅全英國最高。
僱主唔係滙控總公司
今次英國《衞報》爆料，話佢嘅聘用合約，竟然唔係滙控總公司簽，係同一間叫HSBC Asia Holdings簽嘅。
太子傳媒老友即刻打去滙控八吓啦，發言人回應話，集團好多年前已經用呢種方式聘用國際性管理層，只係為咗行政方便，並非涉及稅務優惠。至於前任CEO係咪都係用咁嘅聘用方式先，滙控話既然佢係國際性嘅管理層，照計都係用呢種聘用方式。
但有樣嘢好唔明，歐智華明明係上月正式上任，但篇報道又話今個月簽，發言人就話唔清楚，成為今年首個謎團。
老友仲發現一樣幾得意嘅嘢，篇報道話張合約內容，歐智華嘅辦公室地址填喺香港，似係否認咗上個月有報道話佢將行政總裁辦公室遷番倫敦嘅傳聞。
滙控CEO歐智華新上場，但似乎就有勁多傳聞。（資料圖片）