Fundman睇市：民生銀行長短線皆宜

人民銀行上周五加存款準備金率，唔多唔少影響基金入市胃口，尋日恒指跌109點，報23,485點，無論成交金額及指數波幅，都係踏入兔年以來最低紀錄，個市完全無方向感。

恒生（00011）表示唔再推新H+按揭計劃（以港元同業拆息為基準），表面理由係市場資金成本上漲，但不妨睇港元同業拆息，隔夜到三個月息都係介乎0.05至0.22厘，存款息就更加唔好提，仲係存100萬元一年收100蚊息的0.01厘。筆者都想問吓恒生，到底資金成本上漲壓力何來？恒生按揭生意年初就有收爐迹象，講來講去，咪又係對樓市唔多樂觀、提早避險所致？

美銀美林估計，星期三份財政預算案會再有穩定樓價措施出籠，「守財奴」鬍鬚曾會將每年新落成住宅數量，由2萬提高到3萬為目標，增加土地供應量。不過，該行以香港人口在二○二○年前每年增加0.9%，認為建屋量3萬間都唔夠，最少要3.8萬間，先可以令住屋市場達到供求平衡，樓市愈打愈升下，美林亦唔排除政府再加印花稅，以及降低按揭成數的可能。港府出招完全無章法可言，最受影響嘅仲係一批真正有需要嘅市民大眾。

又到內銀業績期，由於擔心內地通脹失控，緊縮貨幣政策下換來壞帳上升，或者惹來不對稱加息，對銀行息差造成損害，令內銀股在本月十一日出現過一陣恐慌拋售。不過，愈近業績期，內銀股表現反而愈強，而基金也開始從估值低殘的內銀股中尋寶。筆者相信，六至十二個月的低位，可能在本月中已出現。

年度業績料勝預期

民生銀行（01988）較幾間香港上市內銀股規模細，是全國第九大銀行。和國有銀行不同，民行較側重中小企業客戶，大約佔貸款組合兩成五，以風險作為貸款定價標準。

民行過去幾季的息差壓力相對同業輕微，去年首三季盈利130億元（人民幣．下同），超越前年的121億元。大行估計，全年業績會介乎136億至168億元，以平均數157.3億元計，市盈率9.7倍，但這意味着第四季只賺27.3億元，比第三季的41.4億元差不多少了三分之一。

從營運指引，筆者認為分析員估得過於保守，相信到時業績勝預期，獲大行重估機會好大。如果出來數字介乎160億至165億元，市盈率9.4倍，即使考慮埋三月中股東大會，通過非公開發A股集資，估計未來三年每股盈利平均增長都會在一成以上，中長線估值吸引，短線又可炒業績，可謂長短皆宜。