股海實戰：中航科工上車最後召集

埃及政治事件正蔓延中東其他地方，冷不妨中國兩會召開在即，又突然生出「花」來，考驗中國領導人嘅應變能力。雖然傳來不穩定因素，加上上周五收市後人行調高存款準備金率，惟見尋日內地A股不跌反升，滬綜指收報2,932點，升32點，相信正係「國家隊」嘅維穩力量使然。

阿莊估計，喺兩會前後不容出亂子嘅大前提之下，樓市已廢武功，能發揮穩定作用嘅只有股市。若此推斷正確，短期會見到A股市場持續靠穩，滬綜指甚而會叩3,000點大關，並正好迎接本港中資股業績期嘅來臨。有冇咁理想，三月揭盅！

港股尋日發軟蹄，恒指最低落過23,444點，收報23,485點，跌109點，大市成交618億元，反映買賣兩閒。事實上，本周三特區政府公布財政預算案，市場正高度關注政府會否進一步推出打擊樓市炒風措施，加上本周五又係期指結算，短線選擇唔做唔錯實不難理解。

光大控股（00165）旗下已於上海A股上市嘅光大銀行宣布，將發行不超過120億股嘅境外上市外資股（H股），並申請來港上市。可惜光控未受消息提振，股價隨大市偏軟，收報16.6元，跌1.54%，持股要考耐性。

反正呢期市況淡靜冇咩好做，阿莊身痕落場炒下上落，見手持嘅中國南車（01766）尚未重上10元，正所謂「有胡唔食罪大惡極」，尋日遂以平均價9.6元沽出喺舊年十一月買入嗰5萬股，獲利2.1萬元，但阿莊依然睇好呢隻股，暫無意進一步減持，並會待試9元邊才翻兜。

上周六起內地調高成品油價格，消息本來對石化股有利，誰知中石化（00386）衝上8.71元後掉頭回落，收報8.34元，跌2.3%；上石化（00338）及儀征化纖（01033）均低收作結，跌幅分別為0.8%及1.6%，趁好消息出貨。而阿莊始終認為，石化股基本因素有改善，短線快速調整不一定係壞事。

博反彈首選國航

查實真正受到上調成品油價格負面影響嘅，應該係航空股，事關相關調整將直接拉升航空煤油成本，影響航空股嘅毛利，故見尋日3隻航空股東航（00670）、南航（01055）及國航（00753）股價跌幅介乎2.3至3.9%不等。不過，執筆期間傳來多家內地航空公司，將上調國內航線燃油附加費，料有助紓緩成本壓力，若然想博反彈，首選國航，次選東航。

講開航空股，阿莊上月下旬曾提過隻中航科工（02357），指該股獲母公司注入航空業務資產，消息正面，當時做價才3.79元，本月上旬股價衝上4.09元後隨大市回落，最低見過3.69元，但查實跌浪中交投回落，大戶震倉唔成，尋日終於按捺不住，踢到上4.2元，收報4.16元，升5.8%，成交股數3,622萬股，是去年十一月中旬以來最大單日成交股數。

相對於前幾年，呢隻股嘅盈利基礎已大為改善，而母公司對於如今公司專注航空相關製造業務嘅支持亦明確不過，相信未來會適時向其注資。過去三個月股價調整，基本上已消化咗去年六至十一月錄得可觀升幅後嘅獲利沽壓，尋日一支大陽燭，可視為最後召集訊號。

戰報

中興通訊（00763）

中興通訊近日靜靜起革命，尋日抽上高位35.65元，較錢進上月三十一日推介時低位29.95元，大升超過19%。

保利協鑫（03800）

保利協鑫近日強勢再現，尋日又再創3.97元新高，May喺上星期三推介低位3.46元上車，轉眼間已經賺近15%。