王曉初寶島睇Phone景
兩岸交流日見頻繁，聽講中電信（00728）董事長王曉初呢兩日到訪台灣。除咗拜訪電訊同業，尤其係要同當地最重要嘅手機生產商——宏達電集團董事長王雪紅，同埋金仁寶集團董事長許勝雄見面，及早為中電信搶入EVDO做準備。王總嘅寶島行仲會見吓晶片同終端設備供應商，同佢哋討論3G、寬頻、物聯網。
會晤女強人王雪紅
至於重頭戲，就係見王雪紅同許勝雄。王雪紅最近同殼王陳國強合作收購電視廣播（00511），令更多香港人認識呢位女強人。佢旗下有宏達電（HTC）同威睿相當巴閉，HTC已貴為全球五大智能手機品牌之一，威睿又係全球主要CDMA晶片業者，佢哋淨係就採購手機、EVDO終端設備都有排傾。
金仁寶集團橫跨筆記電腦、平板電腦與手機代工、網通設備同電訊服務，據聞王總重視同金仁寶老闆許勝雄見面，要傾吓3G大計！