柳總搵接班人學股神

聯想集團（00992）主席柳傳志到四月份將滿六十七歲，近期經常被問到退休問題，又好關心佢心目中邊個係接班人。

查實柳總一直在考慮接班人問題，曾經同股神巴菲特交流過，並吸收其部分經驗。柳總話會喺公司裏集體討論接班人計劃，並明確定下接班人，但是每隔五年會根據接班人嘅表現，作出調整策略。

退休安排分兩步走

柳總自○九年初復出，同聯想CEO楊元慶等國際團隊，一齊帶領聯想連續五個季度成為全球前五大電腦廠商中增長最快嘅廠商後，柳總再度萌生退意。佢將退休同埋搵接班人問題，做出分兩步走嘅安排。

聯想係柳總嘅命根，至今仍然傾注了很大精力。內地《第一財經日報》引述佢嘅說話：「遇到合適嘅企業和合適嘅價格，我們會繼續收購。」柳傳志希望聯想唔單只做到「體量」更大，而且要成為受人尊敬嘅國際性企業，喺產品技術上更好地為社會服務，在未來技術上發展得更好，若從聯想退休之後，柳總第二步係會從聯想控股退休，但睇怕要等聯想控股整體完成上市後，至會行到呢一步。