短炒倉：新天綠色值博率高

去年第四季以來由於市場氣氛欠佳，令新股熱潮大為冷卻，唔少喺掛牌之後都潛水收場，新天綠色（00956）正是其中之一。集團去年十月上市，招股價2.66元，之後最高只見過2.91元，隨即展開單邊跌浪，直插至一月尾低見1.82元才告止跌回穩，昨日升3.6%，收報2.02元，但仍較招股價低24%。

其實論基本因素，新天綠色並唔差，集團主要是清潔能源業務，食正國策，現時天然氣和風電各佔其收入約一半，截至去年六月底止的中期盈利約1.47億元人民幣，同比增長81.9%，可見業務正高速增長。

再睇股東陣容，摩根大通、未來基金同嘉實基金（HarvestFund）都係佢嘅股東，並齊齊喺上月底增持，最後入貨價位介乎1.93至1.94元，而大摩近日更發報告唱好新天綠色，指集團基本面強勁，建議買入，目標價為2.77元。

按保守估計，新天綠色全年可賺3億元人民幣，相當於每股盈利約0.26元，現價預測市盈率僅7.77倍，相比同類股如中國風電（00182）、龍源電力（00916）等動輒二、三十倍，估值明顯大低水，即使上番招股價，市盈率都係十倍左右，相當值博，止蝕1.82元。

新天綠色（00956）目標價：2.77元 止蝕價：1.82元