Fundman睇市：國美業績能見度高

前晚商務部公布一月份房屋動工上升14.6%，開工年率59.6萬間，兩個數字都比市場預期好。聯儲局公開一月份議息會議記錄，公開市場委員會委員對經濟復甦信心增強，將經濟增長預測由3至3.6%，上調到3.4至3.9%，明年則由3.5至4.4%，調高到3.6至4.5%。委員強調經濟雖復甦，惟力度未夠強勁，唔足以令失業率大幅回落，年終失業率預期8.8%，睇番仲係比○七年及○八年的全年平均值4.6%及5.8%高一大截。

伯南克講過，在就業市場明顯改善前，美國息率會維持超低水平以振興經濟，聯儲局全年通脹預測只係1.3至1.7%，伯蛇有大條道理繼續推銷其零息政策，懶理新興市場水浸下通脹失控。消息刺激華爾街股市繼續向高位推進，前晚道指升61點，報12,288點。自從去年八月中，伯蛇表示聯儲局有QE2計劃至今，道指展開完美升浪，升勢從無間斷，累積升12.4%，伯南克借用前人格林斯潘的一套（○三年就試過用超低息炮製出樓市泡沫），只係今次係先水浸股市，再曲線刺激樓市，照辦煮碗製造另一次泡沫。

聯想（00992）出第三季成績表，賺9,965萬美元，三季累積溢利2.31億美元，已達街外預測全年2.64億美元盈利嘅87.5%，短期有機會獲大行調高預測，股價昨已見偷步炒高。

首三季，聯想在中國市場銷售額按年有31.7%增長，但回顧中期業績時增長有40.2%，莫非真係畀早前滙豐證券分析員講中，聯想在中國市場未來會開始出現放緩？傳統上較暗淡的第四季，假設賺4,500萬美元，聯想全年盈利2.76億美元，比去年大增1.13倍，市盈率仍達22.9倍，估值唔算吸引。無他，電腦行業相當周期性，利潤率又低，似乎只適宜在行業低迷期間入市，筆者也曾經因為公司回購股份睇好，但結果股價只有片刻光輝。

無明顯行業周期

股神話唔了解的股票最好唔買，諗諗吓，整電腦似乎又不及賣電腦簡單，點解咁講？皆因家電零售較無明顯行業周期，基本上管理及營運效率高低、消費者收入與消費表現才是業績關鍵，比預測微軟及英特爾幾時有新產品出，推動行業換機潮來得容易。相比下，內地三大家電零售商之一的國美（00493），業績能見度點都比聯想高，大行估今年賺24.33億元人民幣（同聯想唔差幾遠），計落市盈率不過15.5倍，買High Tech的聯想？抑或Low Tech的國美？這兩種截然不同的投資態度，確係值得好好想想。