股海實戰：比亞迪電子好戲在後頭

美國聯儲局調高未來數年美國經濟增長預測，美股前晚再度高收，但從近周表現可見，美股上升動力正在減退，相信調整在即，但問題係，美股升，港股跌，但若然美股跌，港股係跟住跌抑或掉頭升？阿莊亦睇唔通，但唔覺呢個係太大問題，反而「北水」何時重臨，先至係後市關鍵。

港股尋日又係搓波格，恒指上落兩百幾點，收報23,301點，升144點，大市成交略為回升至723億元。市場焦點集中喺個別股份消息，如聯想（00992）宣布，截至去年十二月底止首三季度純利同比增長98%至2.3億美元，其中第三季度純利為9,965萬美元，同比增幅25%，刺激股價做好，一度重上5元，見5.01元，收報4.92元，升3.36%。

回看聯想○九年度業績由盈轉虧，但公司臨危不亂，將焦點由歐、美市場重投喺內地嘅大本營，結果憑着跟隨國策，食正內需大浪，一○年度業績經已回復盈利能力，本年度幾可肯定大翻身，這再一次顯示管理層應對危機嘅能力，可為估值增添溢價，每次股價回落至4.5元樓下，可以跟進母公司增持行動，入場買貨！

踏入兔年內房股繼續冇運行，新推嘅「京十五條」限購令力度比「國八條」更加大，二套房貸條款亦與「國八條」相呼應。兩會前中央動作頻頻，訊息清楚不過，就係重申調控樓市力度不放鬆。政策壓力有增無減係事實，但頗大程度已反映喺內房股股價表現上，類似中國海外（00688），技術上股價已經十分超賣，反彈只係遲早問題，阿莊亦有意小試牛刀，博一博無頻撲！

執筆期間傳來越南加息，一加就加兩厘，再融資利率由9厘加到11厘，真係幾重手！投行估計亞洲區各國將陸續作出加息行動，但港元同美元掛鈎，美息唔郁，港息要持續不正常低迷。下周三財爺發表財政預算案，究竟會有咩措施助市民應對通脹壓力，又有咩新招針對樓市，倒值得關注。

電訊設備股看高一線

此外，市場傳聞中電信（00728）即將推出CDMA制式iPhone4，消息刺激股價做好，全日高位4.53元，收報4.5元，升2.98%，成交3.44億元。講開電訊股，三網融合嘅大趨勢之下，三大電訊商未來兩年會繼續加大投入提升電訊設備，以提升競爭力，搶佔份額，故電訊設備股可以睇好。

尋日就見到中國通信服務（00552）股價創五十二周新高5.37元，收市報5.33元，升5.34%，成交1.33億元，睇走勢高處未算高。專門做手機零部件及模組製造嘅比亞迪電子（00285），今年以來股價明顯走強，由3.7元水平反覆升抵本月上旬高位5.79元才現較大回吐，但5元邊已找到支持，近兩日成交增加，相信好戲在後頭。

事實上，內地3G手機應用日益普及，生產上嘅規模效益將促使智能手機價格下降，並將引發內地手機製造業新一輪洗牌，比亞迪喺行頭手執牛耳，嚟緊ODM業務表現更可看高一線。雖然年初以來股價已經累積一定升幅，但估計嚟緊公布嘅業績或可給予市場驚喜，股價升勢未完，可以趁整固上車，下站目標見6.2元，跌穿4.9元止蝕。

戰報

中聯重科（01157）

May上周五話中聯重科低位有承接，當日低位只係17.9元，尋日高見19.94元，不足一周便升超過11%。

恒芯中國（08046）

錢進周一推介嘅恒芯中國尋日強勢破位，高收1.81元，較推介當日低位1.54元，累升超過17%，果然夠眼光。