建行郭珮芳終可遊北京
建行亞洲行政總裁郭珮芳（Miranda）經常要返北京總行開會，太子以為佢應該去晒北京所有地標，原來Miranda上京述職十幾次，根本未試過可以留喺北京觀光。
冇法啦，Miranda出名搏殺，聽講佢次次上京都咁啱係周初至周中，開完會都急急腳返港處理公務，但係下個星期終於可以撞啱喺周末述職完畢，同總行討論吓業務方針，終於可以去一睹北京新地標鳥巢同水立方。
做公益發揮企業責任
除咗呢啲高層次會議之外，聽講建行亞洲已經密鑼緊鼓籌劃新一年嘅新搞作，聽講好似搞吓傳媒春茗同公益活動咁，嚟緊半年差不多個個月都會見到有高層代表。
Miranda話依家要吸引人才，對方除咗事業發展機會之外，愈嚟愈睇公司企業責任，所以會非常努力發展呢個範疇，佢哋上個月開始同小童群益會合作搞青少年伙伴計劃，仲會做足成年，主旨係培育青少年，配合母行建行「建現在、見未來」嘅口號咁話。