李細燕促成經紀大春茗

雖然已過了正月十五，但各團體嘅春茗仍陸續有來，好似下星期二就輪到七大經紀組織（證券業協會、中資證券業協會、證券商協會、證券學會、證券及期貨專業總會、網上經紀協會、專業財經分析及評論家協會）首次破天荒聯合一起喺港交所（00388）展覽廳舉行春茗。立法會議員詹培忠大爆，今次一手撮合七大經紀組織舉行聯合春茗嘅幕後功臣係證券學會會長李細燕。

七大經紀組織齊參與

過去兩年都係五大經紀組織舉行聯合春茗，證券組織「老大哥」證券業協會，及中資證券業協會都係各自搞春茗。

有股壇前輩表示，李細燕大約兩個月前，提出七大經紀組織不如一起團拜呢個構思，排位方面為了以示公平，所以抽籤決定。大家都覺得咁樣做法好公平，同意呢個構思。

太子好奇，李細燕用甚麼招數可以說服各個組織，佢嘅答案就係誠意！

不過，七個組織如果每個會嘅執委都上台，好容易逼爆個台喎，所以有關方面已初部安排只有各會正副主席及秘書上台，之後各會才輪流上台影相。