Fundman睇市：富士康博反彈風險有限

星期三，春天天氣下，窗外白茫茫一片，同股市一樣，能見度十分之低。市場對通脹升溫的預期，仍像濃霧一樣揮之不散，反而股市對此樂觀得多，加上市場認為三月兩會前夕，人行唔會有辣招壓抑流動性政策出台，滬綜指昨日升24點，收報2,923點，升抵去年十一月，由高位3,186點，跌到春節前2,661點低位的五成反彈阻力水平。

A股刺激港股昨回升257點，報23,156點，但論到後市展望，24,000點連番測試，已見阻力非同小可，A股接連做好，佔指數比重唔細的內銀及保險H股再跌空間有限，短期恒指要穿22,400點也不易，成交愈玩愈奀，睇怕好難避免先靜一排。

電子代工王富士康（02038），去年發生多宗員工跳樓自殺事件，日前其主要客戶蘋果公司，發表二○一一年供貨商責任年度報告，內容大致提到對富士康一系列關愛員工的建議作出肯定。報告大抵可視為兩間公司的公關工夫，顯示他們的企業責任，善待供應鏈作業職員，也畀顧客一個安心。

有人話代工生產一部iPhone，富士康大約收取的費用不到電話零售價百分之一，即使未能證實數字真確性，但大抵由富士康去年上半年毛利率得2.79%，相較蘋果公司接近40%，足足比前者多十四倍，可見代工商生意確係唔易做。

為平息風波，去年富士康大幅提升員工待遇，市場期間屢傳富士康因為要求調高代工價錢而失去部分定單，到底蘋果公司是否真心願意負起「企業責任」，相信一○年下半年，或者今年中期業績，多少可以畀投資者看到大概的情況。

大行一面倒睇淡

去年六月開始，富士康股價在4.8至6.35元之間浮沉，筆者翻查彭博資訊統計，十九間有Cover的投行中，六間只建議持有（對不少怕得罪管理層的分析員而言，持有其實已等同睇淡），十三間竟然叫客戶沽售，連一間唱好都無。

富士康○六年九月被選入恒指成分股時，風頭一時無兩，當日市值1,700億元，今日得番不到四分之一，是否已到了否極泰來的時候？從大行研究報告預測，的確再被唱衰的可能性唔大，分析員預測今年賺6,500萬美元，還不到高峰期的十分之一，但市場預計，蘋果公司在今年六月中之前，會相繼更新旗下MacBook、iMac、iPad及推出第五代iPhone，消息對過往有份參與代工的富士康及母公司鴻海精密（台灣上市）或有刺激作用，昨日突然見大成交做好，未知是否春江鴨所為，但如果成交配合，衰無可衰下，博一博死貓彈，看來是風險有限。