股海實戰：中石化分注收集等開車

內地股市持續靠穩，滬綜指尋日企在2,900點樓上收市，滬、深兩市主板成交額超過2,700億元人民幣，可見春節後表叔們終於落場熱身，相信大家都係憑着一個信念入市：愈近兩會會期，A股易升難跌。

港股近期備受外資流出新興市場嘅沽壓影響，春節假後恒指最多唔見千幾點，雖然近日市況回穩，但成交降至只有600多億元，反映未有新錢流入。

事實上，如今內地市場水頭亦緊張，沒有北水南來，香港金魚缸靜到發慌。近日A股成交轉趨活躍，表叔們專心把握時間炒轉A股，無暇兩邊走，港股近日交投正好說明呢點。最樂觀想法係北水先炒A股一轉，三月再落嚟炒轉港股，順手做埋季結，咁就Perfect！

查實自去年末季以來，唔單只散戶損手，就連傳統基金都難搵食，皆因唔少基金重倉股股價累積頗大跌幅，七勞八損，整固需時。就如汽車股比亞迪（01211），去年十月初高位講緊64.7元，尋日低位只有32.6元，唔見一半咁滯；再如體育用品股李寧（02331），去年十月初股價約23.55元，上月低位做13.02元，持倉價值唔見一大截！

除咗基金股之外，去年末季以來掛牌嘅新股，唔少股價都浸浸落，稍為心軟冇斬倉嘅話，不知何年何月可見家鄉。好似去年十月掛牌嘅金風科技（02208）及新天綠色能源（00956），現價均較招股價低兩成有多、環球乳業（01007）更跌四成多；去年十一月掛牌嘅雅士利（01230）、歲寶百貨（00312）較招股價低逾三成；上個月廿八日才掛牌嘅寶峰時尚（01121），唔夠一個月股價已較招股價低逾兩成，你話係咪嚇壞人！

今個月適逢有春節假期，加上假前市況淡靜，本來計劃喺本月上市嘅新股都紛紛打退堂鼓，致使整個二月都冇新股掛牌，投行食白果！如今業界正密切留意三月市況，據聞華能新能源上市計劃或會捲土重來，但礙於市況此一時彼一時，唔排除基金壓價，所以成事與否仍屬未知數。

阿莊話會睇位落注嘅光大控股（00165），尋日遂作出兔年第一宗交易，就係以平均價16.7元買入5萬股光控，該股收報16.8元，升1.7%，成交8,539萬元，希望真係「兔」氣揚眉！

行業增長前景樂觀

中海油（00883）因今年產量目標與市場預期有差距，引發大戶拋售，上月股價顯著下滑，流出資金轉投中石油（00857）及中石化（00386）。講開中石化，市場一直在等候有關部門微調成品油定價機制，相信上半年會有眉目，相關憧憬亦為中石化股價帶來支持。

另一方面，下月召開嘅兩會，將談及「十二五」規劃期間，天然氣產業嘅發展目標，有指未來五年內地天然氣消費年均增長將不少於25%，行業增長前景清晰，難怪基金大戶一邊減持中海油，另一邊則增持中石化。

去年，石化企業業績大躍進幾成事實，相信嚟緊中石化業績亦可以佳績示人，近期股價隨大市調整，但8元邊現承接，若短期再次成功考驗相關水平承接，可考慮分注收集，上望9.5元，跌穿7.5元止蝕。

戰報

昂納光通信（00877）

姚午齊本月二日推介隻昂納光通信，當日低位只係4.84元，尋日以大陽燭抽上5.55元高位，累升近15%。

經緯紡機（00350）

經緯紡機升勢未停，股價尋日再創新高7.28元，較Sammi上周三推介時的低位6.28元，升近16%，風頭一時無兩！